"Манчестер Юнайтед" ва "Челси" "Ланс" ярим ҳимоячиси учун курашади

TEAMtalk хабар беришича, "Манчестер Юнайтед", "Челси", "Вест Хем Юнайтед" ва "Тоттенхем" клублари "Ланс"нинг 23 ёшли ярим ҳимоячиси Мамаду Сангарени кузатмоқда.

Манба маълумотларига кўра, юқоридаги клублар Сангаре Мали терма жамоаси таркибида иштирок этиши кутилаётган Африка Миллатлар кубоги якунлангандан сўнг, футболчига расман қизиқиш билдириши мумкин. Мазкур турнир 21 декабрдан 18 январгача давом этади.

Жорий мавсумда Сангаре барча мусобақаларда 21та ўйинда иштирок этиб, 1та гол урди ва 1та гол узатмасини амалга оширди. Футболчининг клуб билан амалдаги шартномаси 2030 йилнинг ёзигача мўлжалланган. Transfermarkt порталида келтирилган маълумотларга кўра, футболчининг трансфер қиймати 15 миллион еврони ташкил этади. "Манчестер Юнайтед" ва "Челси" Лига 1 ярим ҳимоячиси учун курашиши кутилмоқда.