Coca Cola Суперлигаси. Олмалиқда енгилмаганлар тўқнашуви, "Сўғдиёна" Наманганда меҳмон, "Пахтакор" "Сурхон"ни синовдан ўтказади - 7-тур превьюси

Ўқувчиларимиз эътиборига бўлажак тур превьюсини тақдим этамиз.

Coca Cola Суперлига. 7-тур
1 июль, чоршанба
19:00 - ЛОКОМОТИВ – ҚИЗИЛҚУМ (Оилавий ТВ LIVE)
Ҳакамлар: Равшан Абдувоҳидов, Зуфар Элибоев, Фарҳод Усмонов, Комилжон Расулов
Назоратчи: Арслон Хотамов
Комиссар: Зохиржон Акрамхонов

Рестардан кейин ғалаба қозона олмаган клублар ўртасидаги баҳс. Умуман олганда "Қизилқум" 2020 йилги мавсумда ҳозирча умуман ғалаба нашидасини сургани йўқ.

Ҳозирга қадар "Локомотив" ва "Қизилқум" Ўзбекистон чемпионатида жами 30 марта тўқнаш келишган. 17 бор "темирйўлчилар", 7 бор "олтин изловчилар" 3 очкони қўлга киритишган. Қолган олти учрашувда дуранг кузатилган.

"Локомотив" бу жамоага қарши кечган охирги 12та ўйиннинг (уйда ва сафарда) ҳеч бирида мағлуб бўлмаган - 10та ғалаба ва 2та дуранг. Сўнгги бор "Қизилқум" 2013 йилги мавсумда бу рақибни мағлуб этган экан.

Тошкентдаги ўйинларга эътибор қилсак, 15та ўзаро ўйинда "Қизилқум" икки марта (2012 ва 2005 йилларда) ғолиб бўлган.

19:00 - АНДИЖОН – БУНЁДКОР (Маҳалла ТВ LIVE)
Ҳакамлар: Шавкат Насибуллаев, Расулжон Фозилов, Максим Нехочин, Достон Мирзараимов
Назоратчи: Ғайрат Каримов
Комиссар: Эркин Бахтиёров

“Бургутлар” “қалдирғочлар”га қарши. Ушбу жамоалар шу кунгача 20 маротаба баҳс олиб боришган. Ўтказилган 20 та учрашувнинг 15 тасида “Бунёдкор” жамоасини қўли баланд келган бўлса, “Андижон” бир маротаба ҳам ғалаба қозона олмаган. 5 та учрашувда эса дуранг натижаси қайд этилган.

Андижонда ўтган охирги икки учрашувда ҳам дуранг қайд этилган. "Бунёдкор" сўнгги бор 2015 йилги мавсумда "бургутлар" майдонидан ғалаба билан қайтган экан.

Бу мавсум "Андижон" ўз уйидаги иккала ўйинда ҳам гол ура олмади ва ғалаба қозона олмади. "Бунёдкор" эса сафардаги сўнгги икки учрашувда гол ура олмади ва икки бор мағлуб бўлди.

19:00 - ҚЎҚОН-1912 – МАШЪАЛ (СПОРТ ТВ LIVE)
Ҳакамлар: Виктор Серазитдинов, Абдуҳамидулло Расулов, Авазбек Абдуллаев, Абдурашид Худойберганов
Назоратчи: Игорь Нехочин
Комиссар: Александр Давиденко

Ўз майдонида фақат ғалаба қозонаётган "Қўқон-1912" бу турда сафарда умуман ғалаба қозона олмаган "Машъал"ни қабул қилади.

Бу икки клуб Ўзбекистон чемпионатида бугунга қадар 12 бор ўзаро ўйин ўтказишган. 7 бор "Машъал"нинг қўли баланд келган, 2 бор қўқонликлар зафар қучишган ва 3 бор дуранг қайд этилган.

"Қўқон-1912" бу жамоани 4та ўйиндан буён (уйда ва сафарда) мағлуб эта олмай келмоқда. Сўнгги бор водий клуби 2015 йилда "Машъал"дан устун келган эди.

2 июль, пайшанба
19:00 - БУХОРО – МЕТАЛЛУРГ (Маҳалла ТВ LIVE)
Ҳакамлар: Шерзод Қосимов, Алишер Усмонов, Санжар Шоюсупов, Рустам Чориев
Назоратчи: Андрей Клепиков
Комиссар: Муҳаммад Содиқ Содиқ-Охунов.

"Бухоро" ва "Металлург" ҳозирга қадар 44 бор ўзаро ўйин ўтказишган. 20та учрашувда бекободликлар, 18та баҳсда бухороликлар ғолиб чиқишган. Яна 6та учрашув дуранг натижаси билан тугаган.

"Металлург" бу жамоа майдонида фақат икки марта (2008 ва 2015 йилларда) ғолиб бўлган. "Бухоро" ўз майдонидаги сўнгги 5та учрашувда "Металлург"га умуман ютқазмаган.

20:00 - ПАХТАКОР – СУРХОН (СПОРТ ТВ LIVE)
Ҳакамлар: Элёр Турсунов, Ҳусниддин Шодмонов, Александр Буров, Илья Ильин
Назоратчи: Марат Исмоилов
Комиссар: Рамиль Ильясов

Жамоалар чемпионатлар доирасида ҳозирга қадар 26 беллашувда майдонга тушишган. Ўзаро ўйинларда "Шерлар" катта устунликка эга. 20 ўйинда ғалаба қозонган "Пахтакор" бир бор дуранг қайд этиб, 5 учрашувда имкониятни бой берган.

Сўнгги бор "Сурхон" "Пахтакор"ни бундан 17 йил муқаддам 2003 йилги мавсумда мағлуб этган эди.

Тошкентдаги 13 тўқнашувнинг 12тасида "Пахтакор" ва фақат биттасида "Сурхон" ғалаба қозонган (1994 йил). Демак термизликлар 26 йилдан буён Тошкентда "Пахтакор"ни мағлуб эта олмай келишмоқда.

Бу мавсум "Пахтакор" ўз майдонидаги 4та ўйиннинг барчасида ғолиб бўлди. "Сурхон" эса сафарда ўтказган охирги икки учрашувда рақиблари дарвозасига гол ура олмади ва икки бор имкониятни бой берди.

20:00 - НАВБАҲОР – СЎҒДИЁНА (Дунё бўйлаб ТВ LIVE)
Ҳакамлар: Вадим Агишев, Ришат Нугманов, Ҳасан Набиев, Акмалжон Раҳимов
Назоратчи: Бахтиёр Тоғаев
Комиссар: Сардор Қудратуллаев

Рестарни 7 очко билан бошлаган икки клуб ўртасидаги баҳс. "Навбаҳор" ва "Сўғдиёна" клублари ҳозирга қадар 48 бор тўқнаш келишган. "Лочинлар" 24та учрашувда ғалаба қозонишган. 17 бор жиззахликларнинг қўли баланд келган. Қолган 7та ўйинда дуранг кузатилган.

"Сўғдиёна" ўз тарихида ҳеч қачон Наманганда ғалаба қозона олмаган экан. Водийда ўтган 24та учрашувнинг 5тасида дуранг қайд этилган ва 19та баҳсда "Навбаҳор" ғолиб бўлган. "Сўғдиёна" Намангандан сўнгги бор 2016 йил очко олиб қайтган. "Навбаҳор" бу рақиб билан ўз уйидаги охирги 3та ўйинда 3та ғалабага эришган.

20:00 - АГМК – НАСАФ (Оилавий ТВ LIVE)
Ҳакамлар: Жасур Мухторов, Руслан Серазитдинов, Ҳусниддин Баҳодиров, Достонбек Раҳмонов
Назоратчи: Тимур Абдуллаев
Комиссар: Лазиз Қўчқоров

2020 йилги Суперлигада мағлуб бўлмаган икки клубнинг ўзаро тўқнашуви. АГМК ва "Насаф" Ўзбекистон чемпионатида бугунгача 26 марта ўзаро ўйин ўтказишган. "Аждарлар" ҳисобида 13та ғалаба мавжуд, 4 бор олмалиқликлар 3 очкони қўлга киритишган. Қолган 9та ўйинда томонлар муроса кўчасини танлашган.

АГМК чемпионатда қаторасига 4 ўйиндан буён ғалаба қозонаётган бўлса, "Насаф" карантиндан кейинги ҳамма ўйинда дуранг ўйнамоқда.