Эксперт фикри. Камолиддин Мурзоев: "Навбаҳор"нинг натижаси аянчли, лекин кимнидир ерга уриш ёки кўтариш ноўрин"

Хусусан, Олмалиқда ОКМК "Бунёдкор"га 5 та гол урган бўлса, худди шундай кўрсаткични "Бухоро" "Навбаҳор" билан ўйинда қайд этди. Марказий ўйинда "Нефтчи" ўз майдонида "Динамо"дан устун келди. Ушбу баҳслар юзасидан собиқ футболчи ва Ўзбекистон футболчилар уюшмаси раҳбари Камолиддин Мурзоев фикрлари билан бўлишди. 

"Албатта, бу турда ОКМК - "Бунёдкор" учрашувида кутилмаган натижа бўлди. Бу ерда "Бунёдкор"нинг ўз даражасида ўйнамаганлиги асосий фактор ҳисобланади. Шу билан биргаликда 5 та тўп киритиш ўзи эмас, бу Олмалиқ жамоасининг маҳорати билан боғлиқ. Бундай ўйинлар чемпионат давомида бўлиб туради, шу боис қандайдир фожиа яратиш керак эмас. Шунчаки баъзи бир жамоалар бу типдаги ўйинларга тушиб қолишади. 

"Бухоро" бундан олдин Ўзбекистон Кубогида "Бунёдкор"ни мусобақадан чиқариб юборганди. Бу жамоанинг ўзига ҳос потенциали борлигидан далолат деб ўйлайман. "Навбаҳор"нинг бундай кутилмаган натижаси аянчли ҳолат. Бундай натижаларда бир жамоани ерга уриш ёки кўтариш ноўрин ҳисобланади. Менимча, "Бухоро"га бу ўйинга янги мураббий олиб чиққани ўзгача шижоат берди. Кўпинча бундай ўзгаришлар жуда яхши ёки ёмон натижа олиб келади. "Бухоро"да бу ижобий бўлди. 

"Нефтчи"нинг ўйини ҳақида гапирадиган бўлсак, жуда яхши ўйин гувоҳига айландик. Икки жамоа ҳам олдига юқори мақсад қўйгани кўриниб турди. "Нефтчи" ўз уйида ўйнагани ва охирги дақиқагача кураш олиб борганини айтиш мумкин. Умумий олганда бундай ўйинлар чемпионатимизни безатиб беради. Бизга шундай учрашувлар керак, чунки мавсум якунига етиб боргани сари жамоаларнинг жисмоний ҳолати бироз пасая бошлайди. Шундай шароитда яхши ўйинлар керак деб ўйлайман",- дейди Камолиддин Мурзоев.