JCH-2014. Kosta-Rika – Angliya. PREVYU

O'yindan oldin jamoalar oldiga qo'yilgan vazifa ikki xil – Kosta-Rika guruhdagi birinchi o'rinni saqlab qolish uchun kurashsa, Angliya ketma-ket uchinchi marta yutqazib qo'ymaslik uchun bahs olib boradi.

Kosta-Rika guruhdan chiqish masalasi avvalgi ikki turda g'alaba qozonib naqd qildi. Bu jamoa uchun guruhdan chiqishning o'ziyoq katta natija hisoblanadi. Aytib o'tganimizdek, Kosta-Rika bugun ham g'alaba qozongudek bo'lsa, guruh bahslarini birinchi o'rinda yakunlaydi.



Xorxe Luis Pinto bugungi bahs uchun katta ehtimol bilan bir qator o'zgarishlarni amalga oshirsa kerak. Xususan asosiy tarkib o'yinchilaridan Ruis bilan Kempbelga bosh murabbiyning dam berishi kutilmoqda.

Roy Xojson ham o'z navbatida jahon chempionatida hali o'ynamaganlarga imkon bermoqchi. Bu haqda murabbiy o'z intervyusida aytib o'tdi. Taxminlarga qaraganda, Angliya terma jamoasi safida 9 nafar yangi futbolchi maydonga tushadi. Himoyachilardan faqat Keyxill o'z o'rnini saqlab qolishi mumkin. SHuningdek, Starrijning ham ilk daqiqalardan o'ynashi kutilmoqda. Balki uni Lambert almashtirishi mumkin.



JCH-2014. “D” guruhi. 3-tur
KOSTA-RIKA – ANGLIYA
Belu-Orizonte, “Mineyrao” stadioni.
Bosh hakam: Jamol Xaymudi (Jazoir)

Taxminiy tarkiblar

Kosta-Rika: Navas - Duarte, Gonsales, Miller - Akosta, Kubero, Texeda, Frensis - Kalvo, Barrantes - Urenya

Angliya: Foster - Jons, Keyxill, Smolling, SHou - Uilshir, Lempard - Milner, Barkli, Lallana - Starrij

Jarohat olganlar: Oksleyd-CHemberlen (Angliya)
Diskvalifikaciya: yo'q



Xorxe Luis Pinto (Kosta-Rika termasi bosh murabbiyi):
“Bugun bizga qiyin bo'ladi, chunki Angliya turnirdan ketma-ket uchta mag'lubiyat bilan chiqib ketishni xohlamaydi. SHunday ekan, biz hushyor turishimiz kerak”.

Roy Xojson (Angliya termasi bosh murabbiyi):
“Biz guruhdagi vaziyatni o'zgartirib yuborgan jamoaga qarshi to'p suramiz. Kosta-Rika bilan raqobat qila olishimizni ko'rsatishimiz shart. Ko'plab o'yinchilarga imkoniyat beraman va ular ishonchni oqlashadi deb o'ylayman”.

Qiziqarli faktlar
-   Angliya jahon chempionatlarida hali ketma-ket uch marta mag'lub bo'lmagan. Umuman olganda 1958 yildan beri birinchi marta Angliya guruhdan chiqa olmadi.
-   Roy Xojson hozirgi jamoasi bilan ikki bor mag'lub bo'ldi. Bungacha u 1994 yilgi JCHda SHveycariya bilan ikki bor yutqazgandi.

X.Xoliqov tayyorladi.