Zafar To'raev: "Zominda ikki ochko yo'qotdik"

"Gazchilar" safida shu kuni eng yaxshilardan biri bo'lgan Zafar To'raev "SA" talqiniga ko'ra 1-turning ramziy terma jamoasidan o'rin oldi. SHu munosabat bilan To'raevni suhbatga chorladik.

- CHempionatning ilk o'yini hech bir jamoa uchun oson kechmaydi. Jumladan 15 mart kuni "So'g'diyona"ga qarshi o'tgan bahs ham biz uchun qiyin bo'ldi. Mezbonlar ustunlikka erishdi. Lekin maydonning xolati ham yaxshi emasdi. SHuning uchun o'z o'yinimizni ko'rsatishga qiynaldik. Garchi ilk turda durang qayd etgan bo'lsakda, biz bu o'yinda ikki ochko yo'qotdik. CHunki "Mashal" faqat uch ochko olishni maqsad qilib borgandi.

- Endi taqvimga ko'ra ikkinchi turni o'z maydonimizda "Bunyodkor"ga qarshi o'tkazamiz. Amaldagi chempion bilan bo'lajak bahs ham qiyin bo'ladi. Buni hozirdan anglab turibmiz. Lekin shunga qaramay faqat uch ochko olish uchun maydonga chiqamiz. CHunki o'z muxlislarimiz ko'z o'ngida g'alaba qozonmasak bo'lmaydi.

- "SA"ni kuzatib boraman. Ochig'ini aytsam, sayt ijodkorlarining 1-tur ramziy terma jamoasini tuzganda undan o'rin olishimni kutmagandim. Bu men uchun syurpriz bo'ldi desam ham bo'ladi. Lekin "So'g'diyona"ga qarshi kechgan bahsda shaxsan o'zimning ko'rsatgan o'yinimdan qoniqish xosil qilganim yo'q.

Islombek Rustambekov suhbatlashdi.