"Yuventus"dan ketma-ket 10 g'alaba yoxud Paulo Dibala porlamoqda

Massimiliano Allegri boshchiligidagi "Yuventus" jamoasi A Seriyadagi dastlabki turlarini juda nursiz o'tkazgandi va bir qator mag'lubiyatlarga uchragandi. natijada esa "Yuve"  turnir jadvalining quyi pog'onalarigacha tushib ketgan paytlar ham bo'lgandi.

"Yuventus"ni bir qator etakchilari - Tevez, Vidal, Pirlo kabi futbolchilari tark etganidan so'ng Allegri jamoani yangitdan tuzishni boshlab yuborgandi. Allegri "Yuventus" o'yiniga yangicha nafas olib kirgunga qadar jamoa bir qator uchrashuvlarda muvaffaqiyatsiz o'ynadi. Biroq Allegri to'g'ri yo'ldan ketayotganini isbotladi va "Yuventus" tezda o'zini o'nglab olib, g'alabali seriyalarini boshlab oldi. "Yuve"ga yangi kelib qo'shilgan futbolchi Mario Manjukich, Simone Zaza, Paulo Dibala kabi hujumchilar jamoa o'yiniga moslashib ketishdi. Hujum chizig'i butunlay yangilangani bois mavsum startida bu borada muammolar bo'lgandi. Ayni paytda esa yangi hujumchilar ham o'z o'yinlarini topib olishdi. Simone Zaza maydonga tushayotgan bahslarda ishonchni oqlamoqda, gollar urmoqda. Mario Manjukich esa juda muhim o'yinlarda jamoa joniga oro kirmoqda. Umuman Mario Manjukich har doim jamoasining hal qiluvchi gollarini urishni yaxshi ko'radigan hujumchilar sirasiga kiradi. Mavsum avvalida juda katta pullar evaziga "Palermo"dan sotib olingan yosh istedodli hujumchi Paulo Dibala "Yuventus"da porlashni boshlab yubordi. Ushbu vunderkind "Yuventus"ning so'nggi o'yinlaridagi g'alabalariga katta hissa qo'shmoqda. Yosh iqtidor sohibi "Yuventus"ning ketma-ket 10ta uchrashuvda g'alaba qozonishiga bosh sababchilardan biri bo'lmoqda.

Paulo Dibala so'nggi 10 o'yinda ettita gol kiritib, beshta golga hammualliflik qildi.

Dibala ushbu mavsumda Italiya chempionatida jami 11ta gol urib, to'purarlar poygasida Iguaindan keyin ikkinchi pog'onada ketmoqda.

"Yuventus" qaytdi, Dibala porlamoqda...