Xorvatiya - yulduzlar fabrikasi. Bu jamoani 12 yil oldin mag'lub etganmiz

O'shanda "shaxmatlilar" Franciyada o'tkazilgan katta mundialda munosib o'yin ko'rsatib, uchinchi o'rinni qo'lga kiritgandi.

Katta yoshdagi muxlislar Davor Shuker, Slaven Bilich, Alyosha Asanovich, Robert Prosinechki, Zvonimir Boban, Robert Yarni kabi futbolchilarni yaxshi eslaydilar. 1998 yilgi JCHda ayniqsa Davor Shukerning o'yini ko'pchilikka manzur kelgandi. Xorvatiyalik hujumchi 6ta gol bilan eng yaxshi to'purar bo'lgani ham yodda bo'lsa kerak.

Bugun o'sha "Oltin avlod"ning davomchilariga qarshi maydonga tushamiz. Bu U-17 Jahon chempionatida Xorvatiya o'smirlariga qarshi birinchi marta raqib bo'lishimiz emas. 2013 yil BAAda o'tkazilgan o'tkazilgan kichik mundialda ham Xorvatiya bilan o'ynab 2:1 hisobida g'alaba qozonganmiz. Fujayra shahrida bo'lib o'tgan bellashuvda hisob 1:1 bo'lib turgan paytda, o'yin tugashiga 10 daqiqa qolganida Jamshid Boltaboev to'p kiritib, vakillarimizga 2:1 hisobidagi g'alabani taqdim etgandi. (O'shanda Nodirxo'ja ikkalamiz stadionda edik).

O'sha mundialda biz va Marokash guruhdan chiqib, Xorvatiya va Panamani ortda qoldirib ketganmiz. Eng qizig'i, Panama bilan ham o'shanda o'ynagan ekanmiz. Bugun yana tarix takrorlanayotgandek. Panama o'smirlar termasini guruh bosqichida ishonchli hisobda mag'lub etdik. Endi esa pley-offda Xorvatiya bilan to'qnash kelamiz. 

12 yil oldin 24 oktyabr kuni Xorvatiyani 2:1 hisobida engib, guruhdan chiqqandik. Bugun harakat qilsak, yana tarixni takrorlashga yaqinmiz. Faqat bu safar g'alaba qozonsak, musobaqaning 1/8 finaliga yo'l olamiz.

Hozirgi Xorvatiya o'smirlar termasi ancha kuchli ko'rinyapti. Jamoa guruhda ikki g'alaba va bir durang qayd etib, 7 ochko to'pladi. Va uchta o'yinda o'z darvozasidan atigi bitta gol o'tkazdi. Xorvatiya U-17 guruhda Senegal bilan 0:0 o'ynab, BAAni 3:0, Kosta Rikani esa 3:1 hisobida mag'lub etdi.

Xorvatiya futboli Evropa etakchi o'rinlarda turadi. Mamlakatdan tez-tez nomdor futbolchilar chiqadi. Birgina Luka Modrichning qanchalik mashhur ekani hammaga malum. Biz bugun juda yaxshi jamoaga qarshi o'ynaymiz. Xorvatiyani mag'lub etish o'smirlar terma jamoamizni yana bir pog'ona yuqoriga ko'taradi. Biz mana shunday jamoalar bilan elkama elka o'ynabgina kuchayishimiz mumkin. Muhim o'yin oldidan o'smirlar termamizga omad tilab qolamiz. 12 yil oldingi tarix takrorlanishiga umidvormiz. 

X.Xoliqov.