Xorvatiya bosh murabbiyi: “O'zbekiston jiddiy raqib”

Panama ustidan qozonilgan g'alabadan so'ng xorvatlar uch ochkoga ega bo'lishdi. Bizning hisobimizda esa to'rt ochko bor. Bundan ko'rinib turibdiki, 24 oktyabr kungi bahs o'ta shiddatli kechadi. Bu borada xorvatlar bosh murabbiyi Ivan Gudaljning fikri quyidagicha bo'ldi:

- Panamaga qarshi o'yinni yutib olganimiz yaxshi bo'ldi. Hozir bizda uch ochko bor va bu hol futbolchilarning ruhiyatini ko'tarishi shubhasiz. Panama qarshilik ko'rsatishga harakat qildi, biroq biz qarab turmadik va aytishim mumkin, raqib ustidan haqli g'alabaga erishdik.

- Jamoangiz navbatdagi bahsni O'zbekiston o'smirlariga qarshi o'tkazadi.
- O'ylaymanki, bu o'yin o'ziga yarasha keskin kechadi. Menga O'zbekistonning o'yini yoqyapti va ularni jiddiy raqib deb o'ylayman. Faqat hozircha bu jamoaning kuchli va kuchsiz tomonlari xususida bir narsa deya olmayman.

- Panama ustidan qozonilgan g'alaba O'zbekiston bilan kechadigan o'yinga o'z tasirini ko'rsatadimi?
- Tasir ko'rsatishi tabiiy, chunki g'alaba har doim futbolchilarni ruhlantiradi. Lekin masalaning boshqa tomoni bor, biz Panamani mag'lubiyatga uchratishimizni kutgandik, chunki ular O'zbekiston yoki Marokash kabi kuchli emas. Agar oxirgi turda o'zbekistonlik o'smirlarni mag'lub etsak, ochkolarni oltitaga etkazib guruhdan chiqamiz. SHunday ekan, faqat g'alaba qozonmoqchimiz.

Xayrulla Xoliqov.