“Vodiy futboli”. “Neftchi”ning mag'lubiyatsiz seriyasiga barham berildi

“Andijon”: G'alabadan keyingi engil mashg'ulot
Kecha “Andijon” jamoasi vodiy derbisida “Navbahor”ni 3:2 hisobida mag'lubiyatga uchratib muxlislarni xursand etdi.
Kechagi o'yindan keyin bugun engil mashg'ulot bo'lib o'tdi. Aniqrog'i, kecha maydonga tushmagan futbolchilar mashg'ulotlarda shug'ullanishdi. Bosh murabbiy jamoaga tatil bermadi va bugundan “Metallurg”ga qarshi o'yinga tayyorgarlik boshlandi. Albatta, ertalabki engil mashg'ulotdan so'ng kunning ikkinchi yarmida dam olishadi. Ertadan esa mashg'ulotlar jiddiy suratda boshlanadi.

“Qo'qon-1912”: Jalil Kimsanov keyingi ikki o'yinni ham o'tkazib yuboradi
8-turda “Qizilqum”ga qarshi kechgan bahsning 15-daqiqasida hakam tomonidan to'g'ridan-to'g'ri qizil kartochka bilan jazolangan Jalil Kimsanovni shundan keyin PFL tartib intizom qo'mitasi 3ta uchrashuvga diskvalifikaciya qildi.
29 yoshli futbolchi kecha Qo'qonda “SHo'rtan”ga qarshi kechgan bahsda ishtirok eta olmadi. Aytish lozimki, Kimsanov endi 10-turda “Lokomotiv” va 11-turda “Navbahor”ga qarshi kechadigan o'yinlarni ham o'tkazib yuboradi.

“Navbahor”: Bugun futbolchilarga dam berildi
Kecha oliy liga 9-doirasida “Navbahor” jamoasi “Andijon”ga safarda 2:3 hisobida imkoniyatni boy berib qo'ydi. Kechagi uchrashuvdan keyin bugun barchaga bir kunlik dam berilgan. Demak, ertadan yana mashg'ulotlarga kirishiladi.

“Neftchi”: Oliy ligadagi mag'lubiyatsiz seriyaga barham berildi
Kecha “Paxtakor”ga 0:2 hisobida imkoniyatni boy berib qo'ygan “Neftchi”ning oliy ligadagi mag'lubiyatsiz seriyasiga chek qo'yildi. SHu kunga qadar milliy birinchilik doirasida 9 ta o'yindan buyon yutqazmay kelayotgan Murod Ismoilov shogirdlarining chiroyli seriyasiga Samvel Babayan boshchiligidagi “Paxtakor” o'yinchilari barham berishdi.