Vinisiusning oilasi birinchi marta Ispaniyadan ketish haqida o'ylamoqda

"Qaymoqranglilar" futbolchisi Vinisius Junior o'yin vaqtida tribunadagi muxlislar tomonidan irqchilikka oid haqoratli so'zlar aytilganiga hakam etiborini qaratdi. Natijada, o'yin 10 daqiqaga to'xtatib qo'yildi. Ammo barchasi shu bilan yakunlanmadi. SHuningdek, qo'shib berilgan daqiqalarda har ikki jamoa vakillari ishtirokida janjal kelib chiqdi, braziliyallik futbolchiga esa qizil kartochka ko'rsatildi. 

Keyinroq Vinni quyidagicha fikr bildirdi:

"Bu birinchi, ikkinchi yoki hatto uchinchi marta ham emas. La Ligada irqchilik oddiy holat, federaciya buni normal vaziyat deb hisoblaydi, raqiblar esa bundan foydalanmoqda.

Qachonlardir Ronaldino, Ronaldo, Krishtianu (Ronaldu) va (Lionel) Messi mahoratini dunyoga ko'z-ko'z qilgan chempionat bugun irqchilarning qo'lida qolib ketdi. Meni qabul qilgan, men juda yaxshi ko'rgan ajoyib mamlakat, bugun dunyo nazarida irqchilik markaziga aylanishga rozi bo'lmoqda. Bularning barchasini indamay kuzatib turgan ispanlarga achinaman, lekin bugun Braziliyada Ispaniya tobora ko'proq irqchilar mamlakati sifatida tilga olinmoqda. Men kuchliman va irqchilarga qarshi oxirigacha kurashaman".

Futbolchining kurashmoqchiligi haqidagi so'zlariga qaramay, uning oila azolari Vinisius bunday muomalaga loyiq emas deb hisoblaydi. SHuning uchun hozirda ular Ispaniyadan ketish haqida jiddiy o'ylashmoqda.  

Qayd etish lozim, muxlislarning o'zini tutishi borasidagi ish bilan Ispaniya policiyasi shug'ullanishni boshlagan.