Viktor Raskov: "Andijon" uchun ko'proq gol urishga harakat qilaman"

Moldaviyalik Aleksey Kasyan ikki yillik tanaffusdan so'ng “Andijon”ga qaytgan bo'lsa, ukrainalik Sergey Dacenko va Viktor Raskov ham bu yil jamoamiz sharafini himoya qilishadi. “Andijon” jamoasi o'z qarorgohiga qaytganidan so'ng Raskov bilan suhbatlashdik.

- Viktor, “Andijon” varianti qanday paydo bo'ldi?
 - O'tgan mavsum yakunlangach erkin o'yinchiga aylangandim. Menga agentlar qo'ng'iroq qilib O'zbekistondan taklif borligini aytishdi. Bunga rad javobini bermadim va “Andijon” safiga qo'shildim.

- So'nggi klubingiz “Avangard”midi?
 - Ha, lekin bu jamoada ikki-uch oy o'ynadim xolos. Umuman olganda oxirgi ikki yildan beri Xarkovning “Gelios” klubida to'p surib kelayotgandim.

- “Andijon” to'g'risida nima deysiz? Jamoa sizni qanday qabul qildi?
 - Hozircha yangi jamoam to'g'risida ko'p narsa bilmayman. Tarkibga qo'shilganimga hali ko'p vaqt bo'lgani yo'q. Ammo ahil jamoa ekanligi ko'rinib turibdi. Futbolchilarchilar bilan do'stlashib oldim.

 - Hamyurtingiz Dacenkoning borligi ham sizga qo'l kelayotgandir?
 - Albatta, bu menga katta plyus bo'lmoqda. Sergey avval ham O'zbekistonda o'ynagan. Yangi muhitga moslashishimga u ham yordam bermoqda.

- Bosh murabbiy haqida fikringiz qanday?
 - Murabbiy to'g'risida yaxshi fikrlarni bildirishim mumkin. Mashg'ulotlarda bizdan nima xohlayotganini tushuntirmoqda. Murabbiy barqaror jamoani shakllantirishga harakat qilyapti.

- “Andijon”ga qanday maqsadda keldingiz?
 - Maqsadlarim yuqori albatta. Birinchi navbatda jamoamiz yaxshi o'yinlar ko'rsatib muxlislarni xursand etishini xohlayman. SHu bilan birga men hujumchiman va “Andijon” uchun ko'proq gol urishga harakat qilaman.