Suhrob Nematov: “Navbahor”ga uzoqdan gol urganim birinchi marotaba yuz berayotgani yo'q”

 Nematov bilan shu xususda suhbatlashganimizda, bu tarzda gol urishi birinchi marotaba yuz bermayotganini aytib o'tdi. 

- Bilasizmi bu tarzda gol urishim oldin ham sodir bo'lgandi - – deya gap boshladi Suhrob Nematov. Aniqrog'i “Quruvchi” (hozirgi “Bunyodkor” – I.R ) oliy ligaga chiqqan ilk yilida “Buxoro” bilan o'ynagandi. O'rinsobarlar bahsida maydonga tushib, xuddi shu tarzda maydon markazidan turib zarba bergan xolda, raqib darvozasini ishg'ol etganman. 

- “Navbahor”ga urgan golingizdan oldin buni qanchalik his etgandingiz?

- Zarba berishdan oldin, “Navbahor” posboniga etibor qaratdim. Oldinroqqa chiqib ketganini ko'rgach, markazga tushib, himoyachimizdan to'pni qabul qilib oldimda, tavakkal qilib, zarba berdim. To'g'risi, buni oldindan aniq bilganman deya olmayman. SHunchaki o'z omadimni sinab ko'rdim. Golga muxlislar va mutaxassislar baho bergani maqul. Afsuski ushbu golim jamoamga foyda keltirmadi. SHuning uchun ham unchalik tatimadi. 

- “Buxoro”ni tarkib jihatdan boshqalarga solishtiradigan bo'lsak, chakki ko'rinmayapti. Lekin jamoaning ishlari yurishmayapti. Bunga nima sabab bo'lmoqda deb hisoblaysiz?

- Ochig'i, o'zimiz ham tushunmayapmiz nima bo'layotganiga. G'alaba uchun ishtiyoq etarli. Lekin natija bo'lmayapti. 

- Ikkinchi davra ham “Buxoro” uchun juda omadsiz boshlandi...

- Taqvim ham biz uchun noqulay kelgandek. Dastlabki ikki turni safarda vodiy jamoalariga qarshi o'tkazdik. Keyin o'z maydonimizda “Nasaf”ni qabul qildik. Bizga bitta g'alaba kerak. Keyin hammasi yaxshi bo'lib ketadi. 

- Davralar oralig'ida tarkibga yangi kelib qo'shilgan futbolchilar qay tarzda jamoani kuchaytirishga erishdi deb hisoblaysiz?

- Asqaraliev, Popovich, Rajabov, Narzullaev, Isroilov, Baqoev kabi yangi kelib qo'shilgan o'yinchilarning tajribasiga shubha yo'q. Ular jamoaga yordam berish maqsadida kelgan. Menimcha yangilarning foydasi katta bo'ladi. 

- Jamoaning ichki muhiti qanday?

- Juda yaxshi.

Islombek Rustambekov suhbatlashdi.