SHahboz Jumaboev: “Birinchi ligani to'liq yoritib borishi uchun ham “SA”ga ko'p kiraman”

“UzDongJu” tarkibida etakchilikni o'z qo'liga olgan 22 yoshli futbolchi jamoadoshlarini qulay pas bilan taminlash birga, o'z nomiga ham jami 21ta gol yozdirib qo'ydi.

Andijonlik futbolchi “Eng yaxshi yarim himoyachi” nominaciyasida g'olib chiqqani va ortda qolgan mavsum haqida saytimizga blic-intervyu berdi.  

- SHahboz, “SA”ni talqiniga ko'ra “Mavsumning eng yaxshi yarim himoyachisi” bo'ldingiz. Bu haqda nima deysiz?
- To'g'risi ilgari birinchi liga toifasida bunday nominaciyalar bo'lmagani uchun ham “Eng yaxshi yarim himoyachi” bo'lishimni kutmagandim. Albatta, bunday etibordan xursand bo'ldim.  

- Bu borada o'zingiz qaysi o'yinchiga ovoz bergan bo'lardingiz?
- Mavsum davomida “Obod” jamoasining sardori Doniyor Hasanov boshqalardan ajralib turdi deyish mumkin.  

- Ortda qolgan chempionat haqida nima deysiz?
- Bu yil o'yinlar qiziqarli kechdi. Har bir uchrashuvda munosib o'yin ko'rsatib, stadionga kelgan muxlislarni xursand qilishga urindik. SHaxsan o'zim miriqib futbol o'ynadim. 

- “UzDongJu” uchun qaysi o'yinlar nisbatan qiyin kechdi?
- “SHo'rtan” bilan “Obod”ga qarshi o'tkazgan uchrashuvlarimizda biroz qiynaldik.

- “championat.asia” saytini kuzatib borasizmi? Agar shunday bo'lsa, sayt sizga nimasi bilan yoqadi?
- Albatta, har kuni “SA”ga kiraman. O'zim birinchi liga jamoasida o'ynayotganim uchun menga ko'proq ushbu saytning aynan o'zimiz ishtirok etayotgan ligani keng tarzda yoritib borilishi manzur bo'ladi. Turning boshqa o'yinlarida qanday natija bo'lganligini tezkorlik bilan bilib borish mumkin bo'ldi. Qolaversa o'zim yoqtirgan xorij jamoalari va futbolchilar haqida xohlagan narsamni bilib borish imkoniyati mavjud. Fursatdan foydalanib, shu o'rinda sayt ijodkorlariga mustahkam sog'liq va ishda omad yor bo'lishini tilab qolaman.

Islombek Rustambekov