SHahboz Beg'amov: "Borussiya D"ning asosiy kuchi bu uning raqibi "Real" ekanligi

Madriddagi o'yin muxlislarga ko'proq gol taqdim etishi mumkin. "Real" - "Borussiya D" uchrashuvida yaqqol favorit deb barcha "Real"ni ko'rsatmoqda. Bu gapga qo'shilish ham mumkin. Ammo Madrid jamoasi raqibiga nisbatan yana bepisandlik bilan qarash noto'g'ri. O'tgan mavsum saboqlari etarli.

Hamma odatdagidek "Real"ni yaqqol favorit qilib qo'ygandi va yakunda nima bo'lganini barcha eslasa kerak. To'g'ri, hozirgi va avvalgi "Borussiya D" bilan tenglashtirish biroz g'alati tuyulishi mumkin. Lekin raqib o'sha-o'sha. Kadrlar masalasida ham etarlicha muammolar bor. Levandovski o'yinni o'tkazib yuboradi. Yana bir qancha jarohatlangan futbolchilar. "Borussiya D"ning asosiy kuchi bu uning raqibi "Real" ekanligi. Dortmund jamoasi bunday bahslarda qanday harakat qilishni juda yaxshi biladi. Yurgen Klopp o'tgan mavsum Joze Mourinoga ko'p jihatlar bo'yicha zo'rligini isbotlab qo'ygandi.

Bu yil Anchelottiga isbotlashga harakat qilib ko'radi. Bu bellashuvda "Real"ning imkoniyatlari yuqoriroq. Lekin bu to'qnashuvda masala hal degani emas. O'yin qiziq o'tadi. Aynan kim g'alaba qozonishi haqida taxmin qilmoqchi emasman. Lekin aslo "Real"ning raqibini autsayder deb bo'lmaydi. O'ylashimcha, bugun har ikkala darvozabon gol o'tkazib yuboradi. "Real"ning hujumlari "yovvoyi", Dortmunliklarning qarshi hujumi Madrid jamoasi uchun "qo'rqinchli" yakunlanishi mumkin.

Joze Mourino bugun "PSJ"ga qarshi safarda zo'rligini isbotlashi talab etiladi. Ibragimovich esa APLdagi jamoalar himoyasi men uchun katta muammo emas degan gapiga bugun javob bera olishi kerak. "CHelsi" himoyachilari APLdagi eng yaxshilaridan biri hisoblanadi. Zlatan bugun gapirgan gapiga maydonda javob bera olishi ko'pchilik uchun qiziq bo'lsa kerak. O'ylashimcha, bu o'yinda maydon egalari kichikroq hisobda g'alaba qozonishlari mumkin. Lekin "CHelsi" himoyasini yorib o'tish juda ham qiyin bo'ladi. ECHL chorak finallarida, yanayam kuchli jamoalar o'rtasidagi uchrashuvlarda favorit va autsayder degan tushunchalar yig'ishtirib qo'yiladi. Hammada imkoniyat bor va barcha jamoalar o'zlarining eng yaxshi o'yinlarini ko'rsatishga harakat qilishadi. Asosiysi, bugungi o'yinlardan kuchli va yuqori sifatli super futbol kutmoqdaman.