"Real" rasman tasdiqladi: Mbappening tizza paylari cho'zilgan, unga operaciya kerak emas

Jarohat va o'tkazib yuborilgan o'yinlar:

Eslatib o'tamiz, franciyalik yulduz 25 fevral kuni Chempionlar Ligasi doirasidagi "Benfika"ga qarshi javob o'yinini (2:1) tizzasidagi bezovtalik sabab o'tkazib yuborgan edi. Shuningdek, u La Liga doirasidagi bugungi "Xetafe"ga qarshi uchrashuv qaydnomasidan ham joy olmadi. Oldinroq Mbappening taxminan uch hafta maydonga tusha olmasligi xabar qilingandi.

Parijdagi tibbiy ko'rik natijalari:

"France24" nashrining xabar berishicha, Kilian o'z tizzasining holatini chuqurroq tekshirtirish maqsadida Parijga uchib ketgan. "Real" bergan rasmiy bayonotga ko'ra, franciyalik shifokorlar tomonidan (klub tibbiy shtabi nazorati ostida) o'tkazilgan tekshiruvlar futbolchining chap tizza paylari cho'zilganini tasdiqladi.

Eng muhimi shundaki, ushbu jarohatni davolash uchun jarrohlik amaliyoti talab etilmaydi va hozirda olib borilayotgan konservativ davolash kursi maqsadga muvofiq va to'g'ri ekanligi isbotlandi.