Qosimov “Bunyodkor”ni tark etdi! (Munosabat)

Bu gap sal oldinroq tarqalgan edi. Yani, Osiyo Kubogi-2015ga qura tashlanishidan oldin. Bizga malum bo'lishicha, O'FF rahbari Mirabror Usmonov Mirjalol Qosimovni yoniga chaqirib, terma jamoa yoki klubdan bittasini tanlashini so'ragan. Qosimov esa o'ylab olish uchun biroz vaqt olgan va qura natijalari malum bo'lgach, terma jamoa variantida to'xtaldi.

Buning ustiga “Bunyodkor” Osiyo chempionlar ligasida qiyin ahvolda qoldi. Klubning guruhdan chiqa olmasligi deyarli aniq bo'lib ulgurdi. Qolaversa, jamoa o'yinida mazmun yo'qolgandek. Bu esa Qosimovning ketishiga sabab bo'ldi. Fikrimcha, Qosimovga bir muddat tanaffus kerak edi. Albatta, u kishining ish faoliyatiga aralashish niyatim yo'q. Lekin insoniylik tarafdan olib qaraganda, aytaylik, oxirgi ikki-uch yilda Qosimov deyarli dam olmasdan ishladi. Doim katta bosim ostida yurdi. Mana shuning uchun ham tanaffus kerak edi.

Malum muddat dam olgan murabbiy o'z ishiga yanada chanqoqlik bilan sho'ng'iydi. Buni evropalik murabbiylar misolida ko'p bora ko'rganmiz. Ana endi Qosimov ham bor etiborini milliy terma jamoaga qaratadi. Futbolchilarni kuzatadi, raqiblarni o'rganadi, jamoani Osiyo chempionatiga tayyorlaydi.

“Bunyodkor”ni esa hozircha Volkov – Otajonov – Ergashev – Sarkisyan kvarteti boshqarib turadi. Lekin jamoaga albatta yangi bosh murabbiy kerak. CHunki chempionlik uchun kurashadigan klubda bitta BOSH bo'lishi shart. Faqat kimligini hozircha bilmaymiz. Qosimov esa nazarimda “Bunyodkor”dan ketib to'g'ri qildi. CHunki baribir ikkita jamoani boshqarish nihoyatda og'ir.

Xabaringiz bor, shu yilning kuzida Janubiy Koreyaning Inchxon shahrida Osiyo o'yinlari bo'lib o'tadi. Mana shu musobaqaga ham terma jamoani Qosimov olib borar ekan. Undan keyin qishda Osiyo Kubogi o'tkaziladi. Xullas, bu yog'iga ish ko'p. Tayyorgarlik, yig'inlar, o'rtoqlik uchrashuvlari degandek. Demak, Qosimov uchun yangi rejalar endi boshlanadi. Biz bu borada Mirjalol Qo'shoqovichga omad tilab qolamiz.

Xayrulla Xoliqov.