O'zbekiston terma jamoasi Livan bilan uchrashuvga tayyor

Mazkur bahsda Bahodir Ahmedov shogirdlari Livan terma jamoasiga qarshi to'p surishadi. Albatta, o'yinning ahamiyati har ikkala tomon uchun juda muhim, negaki, chorak finalni yutgan jamoa, kamida musobaqaning sovrindorlari qatoriga kirish uchun imkoniyatni saqlab qoladi. Bundan tashqari esa, yarim finalga yo'llanma olgan mamlakat terma jamoasi shu yilning o'zida o'tkaziladigan klublar o'rtasidagi Osiyo chempionati yo'llanmasini naqd qilib qo'yadi.

Livanga qarshi bo'lib o'tadigan bahsga milliy terma jamoamiz azolari jiddiy etibor qaratishmoqda. Bir kun oldin bo'lib o'tgan mashg'ulot chog'ida murabbiylar shtabi o'yinning ko'plab jihitlariga urg'u berishdi. Futzalchilar pressing qo'llashni va himoyadan tezkor hujumga o'tishga qaratilgan mashqlarni bajarishdi. CHorak final pley-off tizimida o'tkazilishini inobatga olib, murabbiylar penaltilarni ham unutishmadi.

Umuman olganda, terma jamoamiz to'g'risida gapiradigan bo'lsak, jamoaning ichidagi muhit juda yaxshi. Aynan ahillik va inoqlik Bahodir Ahmedov shogirdlarining kuchli tomonlaridan biri. Bu narsa o'zini nafaqat o'yin jarayonida, balkim kundalik hayotda ham aks ettirib kelyapti.

Terma jamoamiz ichidagi iliq muhit, umid qilamizki bugungi o'yinga ham ijobiy tasir qiladi va futzalchilarimiz ahilligi Livanni mag'lub etishga yordam beradi.