O'zbekiston Kubogi. Yarim final. "Lokomotiv" - "Paxtakor"

CHempionatda peshqadamlik qilayotgan klublar kubokda o'zaro bahs olib boradilar. Hozirga qadar jamoalar O'zbekiston Kubogi bahslari doirasida to'qnash kelishmagan. "Paxtakor" ham, "Lokomotiv" ham o'z oldiga chempionat va kubokda muvaffaqiyatli qatnashish vazifasini qo'ygan. SHu sababli bellashuvlarning keskin, shiddatli va hujumkor o'tishini kutish mumkin.

"Paxtakor" 1/16 final bosqichida "Xorazm"ni 4:0 hisobida mag'lubiyatga uchratdi. 1/8 finalda "Qo'qon-1912" bilan o'yinlarda mehmonda 0:0, uyda 4:0 hisobidagi natijalar kuzatildi. CHorak finalda esa "Oq-tepa" safarda 7:1, "Paxtakor" stadionida 5:1 hisobida tor-mor keltirildi.

"Lokomotiv" esa musobaqaga chorak finaldan kirishib, "Dinamo"ni safarda 4:3, o'z maydonida 3:0 hisobida dog'da qoldirdi. Jamoalar safida barcha etakchi futbolchilar maydonga tushish imkoniyatiga ega.

"Lokomotiv" va "Paxtakor" jamoalari o'rtasidagi uchrashuv 27 iyun, juma kuni soat 19:00da TTYMI stadionida boshlanadi. "Paxtakor" muxlislari soat 17:30dan boshlab stadion hududida to'planishadi. Buni jamoa ishqibozlari uchun keltirib o'tyapmiz.

Bahsni Rustam Bobomurodov boshchiligidagi hakamlar guruhi boshqarib boradi.


LOKOMOTIV - PAXTAKOR

Hakamlar: Rustam Bobomurodov (Navoiy), Ruslan Samandarov (Navoiy), Obid Jumaev (Navoiy), Marat Ismoilov (Toshkent).

Nazoratchi: Gali Imomov (Toshkent).