Osiyo Kubogiga 175 kun qoldi. Tim Keyxillning musobaqadan umidi katta

Yaxshi bilasiz, navbatdagi musobaqa Avstraliyada bo'lib o'tadi. Yaqinda Avstraliya terma jamoasining etakchilaridan biri Tim Keyxillga matbuot vakillari bir nechta savol bilan murojaat qilishdi.

- Siz uchun Osiyo Kubogi qanday ahamiyatga ega?
Tim Keyxill: “Albatta, ko'pchilik qatori men ham turnirda ishtirok etishni xohlayman. Negaki bu Osiyodagi eng katta futbol musobaqasi hisoblanadi. Men har doim jismoniy holatimni yaxshilab borishga harakat qilganman. Bu musobaqa men uchun oxirgisi bo'lishi mumkin, shu bois unda g'alaba qozonish uchun bor kuchni ishga solaman”.

- Osiyo Kubogi Avstraliya uchun qanchalik muhim?
Tim Keyxill: “Musobaqa birinchi marta bizning mamlakatda o'tkaziladi. Bu esa muxlislarga katta quvonchni tortiq etadi. Dunyo aholisining yarmidan ko'pining nigohi bizga qaratiladi. Qolaversa, Avstraliyaga Osiyoning eng kuchli terma jamoalari kelishadi. O'ylaymanki, biz musobaqani yuqori saviyada o'tkazamiz”.

- Muxlislarga nima deya olasiz?
Tim Keyxill: “Biz uchun hamma stadion to'lishi juda muhim. Men chiptalar narxi bilan tanishib chiqdim. Bolalarga 5 dollar, kattalarga 15 dollar ekan. Bu unchalik qimmat emas. Agar o'yinlarimizda ishqibozlar astoydil qo'llab turishsa, musobaqada g'olib chiqa olamiz. CHunki muxlislarning olqishi biz uchun hamma narsadan ustun”.

X.Xoliqov tayyorladi.