Osiyo chempionati (U-22) oldidan. Abbos Maxsitaliev: "Birinchi oltin medalimni qo'lga kiritmoqchiman"

"Yigitlarni hammasida g'alabaga ishonch bor va shunisi eng muhim. Yuqori maqsadlar bilan yo'lga chiqmoqdamiz va erishish uchun qo'limizdan kelgan barchasini qilamiz. Kayfiyat va tayyorgarlik juda yaxshi" - deya aytib o'tadi Abbos Maxsitaliev.

- Abbos siz ko'plab xalqaro turnirlarda ishtirok etib kelmoqdasiz. Aynan mana shu Osiyo chempionati haqida fikringiz qanday?
- Hozirgacha klub bilan va terma jamoa bilan ko'plab turnirlarda ishtirok etdim. Ochig'ini aytsam faoliyatimda terma jamoa bilan birinchi oltin medalimni qo'lga kiritishni istayman. Bungacha Toshkentda o'tgan Osiyo chempionatida (U-16) kumushni olgan edik. BAA dagi Osiyo chempionatida (U-19) esa yarim finalga etib borgan edik. Balki endi vaqti kelgandir oltin medallarga ega chiqishni. Ushbu turnir bizga Braziliyadagi Olimpiyada uchun yo'l bo'ladi shu bois ahamiyati juda kattadir.

- Tarkibdagi aralashlik jamoaga muammo tug'dirmaydimi?
- O'ylashimcha bunday bo'lmaydi. SHaxsan men ushbu jamoadagi deyarli barcha futbolchilar bilan birga o'ynaganman va hech qanday mummosiz tushunamiz. Ayniqda jahon chempionatidagi jamoadoshlarim bilan bunday muammo bo'lmasligini bilaman. Bizga tajribaliroq futbolchilarning qo'shilishi esa faqat o'yinimizni kuchaytiradi.

Humoyun Davurov suhbatlashdi.