Oliy liga 1-tur. Qopqon, yangi stadion, Andijonda anshlag

QOPQON
Oliy liga uchun alohida tayyorlangan saytimizda ilk turning barcha o'yinlarini tarkiblar bilan berdik. Ko'p hollarda bizdagi malumotlar OAVda manbasiz chiqib borishiga ko'nikib qoldik. Qitmirligimiz keldi. Bunda "So'g'diyona" - "Mashal" uchrashuvi bizga qo'l keldi. Avvaliga "So'g'diyona" tarkibida Suhrob Qobilovni Suhrob Odilov deb yozdik. Keyin "Mashal" tarkibini qaydnoma ketma-ketligida emas, “o'tdan-bo'tdan” qilib yozdik. Bu esa ish berdi, OAVda Qobilov emas Odilov, "Mashal" tarkibi esa xuddi bizning ketma-ketlikda joy oldi. Ham kulasam, ham mehnatingga achinasan.

NAGAEV
"Lokomotiv"ga 23-milliy chempionatdagi ilk uch ochkoni Ivan Nagaev keltirdi. Hujumchi 45-daqiqada "Navbahor" posbonini ojiz qoldirib yangi mavsumning birinchi golini urdi. Tabiiyki, ilk golni "Navbahor" darvozaboni Doniyor Usmonov o'tkazib yubordi.

ANDIJONDA ANSHLAG
"Neftchi" va "Navbahor"ning 2013 yilda uy uchrashuvlarini boshqa stadionda o'tkazishi, "Andijon"ning quyi ligada qatnashishi, oliy liga muxlislari statistikasini ancha huvillatib qo'ygandi. Lekin 1-turdagi "Andijon" - "Paxtakor" uchrashuvini stadionda 18 221 nafar ishqiboz tomosha qildi. Yana 2 000 nafarga yaqin muxlis stadion oldida o'yinga kira olmay qolib ketdi.

OLMALIQDA YANGI STADION
Yakshanba kuni "Olmaliq" klubi uchun maxsus qurib bitkazilgan 12 000 tomoshabinga mo'ljallangan yangi stadionning ochilish marosimi bo'lib o'tdi. Ochilish marosimiga tashrif buyurgan ishqibozlar ko'ngilochar tadbirlardan ham bahramand bo'ldilar.

YANA VOBKENT
Buxorodek shahri azimda shunday chiroyli stadion bo'lishiga qaramasdan, “Buxoro” uy uchrashuvini yana Vobkentda o'tkazdi. O'yin paytidaolingan fotosuratlarni ko'rib qo'rqib ketasan kishi. Kimdir aytganidek, “Buxoro” – “Neftchi” bahsi futbol maydonida emas, balki ekin eksa bo'ladigan dalada bo'lib o'tdi.