Odiljon Abdurahmonov: “Futbolchi sifatida o'sishni istaganim uchun ham “Bunyodkor”ga kelganman”

Xo'sh, bu futbolchi Superligada o'ynab, qanday taassurotlarga ega bo'ldi? Quyida u bilan bo'lgan suhbatimiz vaqtida barcha savollarimizga javob oldik.

- Odiljon, “Bunyodkor”ga kelishingizdan avval qaysi klublar sharafini himoya qilgansiz?
- Faoliyatimni dastlabki qismini Qirg'iziston chempionatida o'tkazganman. Dastlab “Aldier” tarkibida bir muddat to'p tepganman. Keyinchalik “Oloy” bilan shartnoma imzoladim hamda u klubda besh mavsum davomida faoliyatimni davom ettirdim. Yil boshida “Bunyodkor”dan taklif tushdi. SHu tariqa, hozirda faoliyatimni “qaldirg'ochlar” safida o'tkazmoqdaman.

- Klubda o'tkazayotgan faoliyatingizdan qoniqish hosil qilyapsizmi?
- Albatta. CHunki klubda futbol ichidagi insonlar yig'ilgan va barchasi professional tarzda ishlashadi. SHuningdek, O'zbekiston Superligasi ancha kuchli. Bu erda o'ynash orqali tajribamni yanada oshirmoqdaman. Kelajakda yanada kuchli jamoalar safida o'ynashni istaganim uchun ham “Bunyodkor”dan tushgan taklifga rozilik bildirganman. Sovrinli o'rinlarni qo'lga kiritish istagida tashrif buyurganman. Qisqasi, bu erda o'tkazayotgan faoliyatimdan to'liq qoniqish hosil qilyabman.

- Deylik, “Bunyodkor” Qirg'iziston chempionatida to'p tepganida, mavsumni nechanchi o'rinda tugatgan bo'lardi?
- Menimcha, har yili chempionlikni qo'lga kiritgan bo'lardi. Negaki, Superliga saviyasi juda yuqori. To'g'risini aytish kerak, Qirg'iziston chempionati saviyasi bilan solishtirib bo'lmaydi. Qolaversa, “Bunyodkor”da juda ko'p kuchli futbolchilar to'p tepadi. Yoshlar ham juda yaxshi harakat qilmoqda. SHu boisdan jamoa oltin medallarni har yili o'zini qilishi mumkin edi.

- Superliga saviyasidan olgan taassurotlaringiz qanday?
- O'zbekistonda futbol saviyasi yuqori. Men o'zim o'yinlarda ishtirok etib, shunga amin bo'ldimki, o'sishga istagan yoshlar uchun foydali. Osiyoda o'ziga yarasha obro'ga ega bo'lgan chempionatlardan biri hisoblanadi.

- Qirg'iziston milliy terma jamoasi oktyabr oyida yig'in o'tkazmadimi?
- O'rtoqlik uchrashuvi o'tkazadigan jamoamiz bilan kelishuvga erisha olingani yo'q. SHu tufayli mazkur yig'in o'tkazilmadi. Bilishimcha, terma jamoamiz noyabr oyida o'quv-yig'in tashkil qiladi.