"Nasaf" murabbiyi "Manchester Siti"dagi hamkasbi bilan Polshada birga ishlaydi FOTO

Polshaning Barvice shahrida yosh darvozabonlar uchun o'tkazilayotgan o'quv-yig'in seminarida Denis Ivankov murabbiy-yo'riqchi (instruktor) sifatida ishtirok etmoqda. "Nasaf" murabbiyi Ivankov bilan birgalikda u erda Angliyaning "Bolton" va "Manchester Siti" jamoasi darvozabonlar murabbiyi va polshalik murabbiylar yo'riqchi sifatida qatnashishmoqda.

Denis Ivankov u erda yuqorida tilga olingan hamkasblari bilan o'zlarining mashg'ulot dasturlaridan namuna ko'rsatishmoqda.

Evropa, Rossiya, Ukraina, Belarus va AQSHdan tashrif buyurgan yuzga yaqin yosh darvozabonlarni Denis Ivankov o'zining maxsus mashg'ulot dasturi bo'yicha shug'ullantirmoqda va darvozabonlar murabbiylariga mahorat darsini (master-klass) o'tamoqda. Ushbu o'quv-yig'ini 1 hafta davom etadi.

Polshaning Barvice shahridagi "GOALKEEPER" nomli darvozabonlar maktabi evropada darvozabonlarni tayyorlaydigan eng yaxshi akademiya hisoblanadi. "Nasaf"da faoliyat yuritayotgan Denis Ivankovni esa ushbu akademiya rahbari Sergey SHipovskiyni shaxsan o'zi taklif etgan.

Qayd etish kerakki, Denis Ivankov avvaliga "Mashal" va 2013 yildan boshlab "Nasaf"da faoliyat yuritib kelmoqda. Ushbu davr mobaynia Ivankov bir qator terma jamoaga nomzod kiperlarni tarbiyalashga muvaffaq bo'ldi.

Ayni paytda O'zbekiston terma jamoasi va "Paxtakor" darvozaboni sanalgan Eldorbek Suyunov, "Mashal"da porlagan, "Nasaf"da o'ynayotgan Sanjar Quvvatov, "Qo'qon-1912" darvozasini ajoyib tarzda qo'riqlayotgan O'tkir Yusupov ham aynan Denis Ivankov kashf etib bergan iqtidorli darvozabonlar hisoblanadi.

SHuningdek, hozirda O'zbekiston yoshlar va olimpiya terma jamoalariga nomzod bo'lgan "Nasaf"ning iqtidorli yosh posboni Umid Ergashev ham Denis Ivankovning topilmasi sanaladi. Yuqoridagi barcha darvozabonlar terma jamoa darvozabonlari va nomzod kiperlar sanalishadi.