"Nasaf": Biz vakillarimiz bilan faxrlanamiz!

Ushbu chempionatda Jasur Abduraimov boshchiligidaga yoshlarimiz terma jamoasi ham muvaffaqiyatli ishtirok etmoqda. Yoshlarimiz kecha muhim g'alabasini qo'lga kiritib, guruhda muddatidan avval 1-o'rinni naqd qildi. Endi yoshlarimiz musobaqa chorak finalida “S” guruhida 2-o'rinni egallagan terma jamoa bilan bahs yuritadi. Demak, yoshlarimizga Yaponiya, Qatar yoki Eron yoshlari raqib bo'lishi mumkin.

Eslatib o'tamiz, musobaqada yarim finalga chiqqan to'rt jamoa keyingi yil Janubiy Koreyada o'tadigan U-20 Jahon chempionatiga yo'llanmani qo'lga kiritadi.

Terma jamoa safida “Nasaf”ning 4 nafar asosiy tarkib o'yinchilari ham bor. Bular darvozabon - Umidjon Ergashev (17 yosh), yarim himoyachilar - Azizjon G'aniev (18 yosh) va SHarof Muhiddinovlar (19 yosh) hamda hujumchimiz - Bobir Abduholiqovlardir (19 yosh). Ushbu o'yinchilarimizning barchasi klubimiz futbol maktabining tarbiyalanuvchilaridir.

“Nasaf” PFK ushbu yoshlarimizning Osiyo chempionatida yurtimiz shanini munosib himoya qilayotganidan faxrlanadi.

Kecha bo'lib o'tgan Avstraliya yoshlariga qarshi uchrashuvda Bobir Abduholiqov 29-daqiqada gol kiritib, yoshlarimizni hisobda oldinga olib chiqdi.

Xo'sh, ushbu futbolchilarimiz chempionatda qanday ishtirok etishmoqda? 15 oktyabr kuni Tojikiston yoshlariga qarshi uchrashuvda yoshlarimiz irodali 2:1 hisobida g'alaba quchganidan xabaringiz bor. Ushbu uchrashuvda Umidjon Ergashev, Azizjon G'aniev va SHarof Muhiddinovlar to'liq maydonda harakat qilishdi. Bobir Abduholiqov esa ikkinchi bo'limdan maydonga tushdi.

Kecha bo'lib o'tgan Avstraliya yoshlariga qarshi uchrashuvda esa Azizjon G'aniev, SHarof Muhiddinovlar to'liq o'ynashdi. Bobir Abduxoliqov 69-daqiqada almashtirildi. Darvozabonimiz Umidjon Ergashev zahirada qoldirildi.

Yana shuni takidlash joizki, o'tgan ikki uchrashuvda SHarof Muhiddinov va Azizjon G'anievlar bir martadan hakam tomonidan ogohlantirish ham olgan.

U-19 terma jamoamiz safida shuningdek, Samarqandning “Dinamo”, Qo'qonning “Qo'qon-1912”, Bekobodning “Metallurg”, Navoiyning “Qizilqum”, Olmaliqning “Olmaliq”, Farg'onaning “Neftchi”, Toshkentning “Paxtakor” va “Bunyodkor” hamda Respublika Olimpiya Zahiralari Kollejidan ham vakillar borligi etiborlidir.

Umid qilamizki, ushbu futbolchilarimiz terma jamoamiz safida chiroyli o'yin ko'rsatishib, yurtimiz shanini munosib himoya qilishadi va mamlakatmizga yorug' yuz bilan qaytishadi. Ularga barcha o'zbek futbol ishqbozlari nomidan ulkan zafarlar tilab qolamiz. Biz sizlar bilan faxrlanamiz!