“Nasaf” besh turdan buyon o'z darvozasi daxlsizligini saqlashga erishmoqda

Ikkinchi davra bellashuvlarini ko'tarinki ruhda boshlagan Berdiev shogirdlari so'nggi beshta uchrashuvda ilk bor raqib darvozasini ishg'ol eta olishmadi. SHu bilan birga Qarshi klubining himoya chizig'i besh turdan buyon raqib futbolchilariga gol urish imkonini bermay kelmoqda. So'nggi marta qarshiliklar 12-turda “Bunyodkor”ga (2:2) qarshi bellashuvda gol o'tkazishgandi. SHundan keyin ketma ket beshta (“Lokomotiv” -4:0, “Qizilqum” - 4:0, “Andijon” – 1:0, “Surxon” -5:0, “Navbahor”- 0:0) uchrashuvda voha klubi darvozasiga raqiblari yo'l topa olishmayapti.

Superliga 17-turidan keyin Berdiev shogirdlari 33 ochko bilan turnir jadvalida uchinchi pog'onada bormoqda. “Nasaf” ayni paytda Superligada “Paxtakor”dan (9 ta gol) keyin eng kam gol o'tkazgan jamoa (15 gol) bo'lib turibdi.