"Napoli" Osimxenning narxini oshirdi

Viktor Osimxen Evropaning eng talabgir hujumchilaridan biriga aylandi.

"Il Mattino"ning xabar berishicha, "Napoli" nigeriyalik futbolchining narxini oshirgan.

Osimxen ko'p yillardan so'ng "Napoli"ga Italiya chempionati chempionligini qaytarishda muhim rol o'ynadi. Nigeriyalik futbolchi joriy mavsum A Seriyada 23 ta gol urdi.

So'nggi haftalarda 24 yoshli hujumchiga PSJ, "Bavariya" yoki "Manchester Yunayted" tomonidan qiziqishlar bo'ldi. 

"Il Mattino" nashrining qo'shimcha qilishicha, futbolchi seshanba kuni Parijga borib kelgan. Ushbu sayohat tafsilotlari nomalum, ammo u o'z agenti Roberto Kalenda bilan birga bo'lgan.

"Napoli" prezidenti Aurelio De Laurentis o'z futbolchisi atrofidagi vaziyatni kuzatmoqda. "Napoli" xo'jayini hatto nigeriyalik futbolchining narxini 160 million evroga ko'tardi. Klublar o'rtasidagi kurash tufayli bu miqdorni oshirish mumkinligiga umid qilinmoqda.

Osimxenning "Napoli" bilan bitimi 2025 yilning o'rtalariga qadar tuzilgan. Klub unga shartnomani uzaytirish va maoshini oshirish taklifini bermoqchi.