Murod Ismoilov: "Fyodorov bosh murabbiylik vazifasini yaxshi bajarmoqda"

Murabbiy matbuot vakili bilan muloqotga kirisharkan, dastavval “Neftchi” – “Bunyodkor” o'yini haqida gapirdi va Andrey Fyodrovning bosh murabbiylik faoliyati yaxshi kechayotganini ham takidladi.

Bugun biz juda kuchli raqibga qarshi o'ynaydik, - deb gap boshladi Murod Ismoilov. Yigitlar barcha ko'rsatmalarni to'g'ri bajarib chiroyli g'alabaga erishishdi. Bu natija bilan rahbarlarni va klub muxlislarini xursand qildik deb o'ylayman. Bizni buyog'iga qiyin o'yinlar kutyapti va ularga jiddiy tayyorlanishda davom etishimiz lozim. Yana bir bor barcha “Neftchi” muxlislarini qutlayman.

-   Murod Muzaffarovich, birinchi davradagi “Bunyodkor” – “Neftchi” bahsida Toshkent klubi katta ustunlik qilgandi. Lekin bugun o'yin teng kurashlar ostida o'tdi. Bu “Neftchi” klubining o'sganidan dalolatmi?
-   “Bunyodkor” yaqinda bir qator qiyin bahslarda ishtirok etdi. SHuning uchun raqibda biroz toliqish bor edi. Undan tashqari “Neftchi” jamoasining o'yini ham qovushdi deb o'ylayman. Yigitlar barcha ko'rsatmalarni to'g'ri bajarishdi.

-   Siz bilan suhbatda bo'lganimizda, Murod Bobojonov haqida ko'p iliq fikrlar bildirasiz. Bugun yosh o'yinchi muhim bo'lgan golni kiritdi...
-   Ha, albatta. Murodjon golga chanqoq hujumchi. Vaziyatlardan foydalanishga urinadi. “Bunyodkor”ga qarshi bahsdan oldin “bugun Murodjon gol uradi-a” deb yaxshi niyat qilib turgandik. Niyatimiz amalga oshdi. Lekin baribir Murod o'z ustida ko'p ishlashi lozim.Kelajagi porloq yigit.

-   So'nggi vaqtlarda bosh murabbiylik vazifasini topshirganingiz ko'p muhokama bo'lyapti. Bu voqealikdan ranjigan muxlislar ham yo'q emas..
-   Nega ranjishadi? Sog'lig'im borasida muammo bor. Man ko'p aytaman, birinchi o'rinda “Neftchi”ning natijasi turadi. Qachonki, biron bir futbolchi yoki murabbiy jamoadan ustun tursa, bunda klubga yakun yasaladi. Hamisha klub manfaatlari birinchi o'rinda turish kerak. SHuning uchun bosh murabbiylik masalasidagi qaror juda to'g'ri bo'ldi deb o'ylayman. Yaratgan shukur, do'stim Fyodrov bu vazifani yaxshi bajaryapti. Men esa elkama-elka birga mehnat qilyapman. Andrey Fyodrov bilan mening g'oyalarim deyarli bir yo'nalishda. Bizning asosiy maqsadimiz, o'ylagan g'oyalarimizning amalga oshishi hisoblanadi. Mana Yaratganga shukur mehnatlar sekin-asta samara beryapti. Bilasizmi, men nimani tarafdoriman ? Farg'onada doimo mazmunli futbol bo'lsin.

“Ruxsor” TRK matbuot xizmati.