MTJ: “Jar”da navbatdagi mashg'ulot (FOTO)

Odatdagidek bir yarim soat davom etgan mashg'ulot ancha qiziq kechdi.  Futbolchilar maza qilib shug'ullanishdi desa bo'ladi. Bu safar terma jamoamizda safida ikkita darvozabon mashg'ulot o'tkazdi: Ignatiy Nesterov bilan Eldor Suyunov. Nikita Ribkin esa oliy ligadan o'rin olgan “Olmaliq” - “Paxtakor” bahsida ishtirok etish uchun vaqtincha klub ixtiyoriga jo'nab ketdi.



Qolgan o'yinchilar esa kechagi mashg'ulotda qatnashishdi. Odatdagidek chigalyozdi mashqlari bilan boshlangan mashg'ulot maydonning yarim qismida futbol o'ynash bilan davom ettirildi. Lekin bunda yigitlar har doimgidek futbol o'ynashmadi. Balki, maydon chizig'i tashqarisida har bir tarkib uchun ikkitadan futbolchi turdi va ularning ishi raqibni chalg'itish orqali o'z jamoalariga yordam berish bo'ldi. Bunda asosiy vazifani himoyachilar bajarishdi.



Ushbu mashg'ulot yakuniga etgach, futbolchilar jarima to'plarini amalga oshirish ustida ishlashdi. SHuni aytish kerak, nima uchundir aksariyat futbolchilarmiz jarima zarbalarini mohirona tepa olishmadi. Bu hol hatto jarima to'pini yaxshi tepadigan futbolchilarda ham kuzatildi. O'yinda bo'lgani kabi ko'p zarbalar darvozadan ancha balandga yo'naltirildi. Bu borada yana va yana ko'proq ishlashga to'g'ri keladi shekilli. Mashg'ulot yakuniga etganidan keyin ham Server Jeparov bilan Sardor Rashidov jarima zarbasini berishda davom etishdi. Bunda darvozada Ignatiy Nesterov turdi.



Bugun o'yinoldi oxirgi mashg'ulot bo'ladi. Ertaga esa bizni Yangi Zelandiyaga qarshi o'rtoqlik uchrashuvi kutib turibdi. O'yin soat 19:00da “Paxtakor” stadionida boshlanadi.