MLS yulduzlari qanchaga baholanmoqda?

Faqat qariyalargina emas, Evropa grandlarida ham bemalol o'ynay oladigan Oskar, Halk, Karassko, Paulino kabilar o'z darajasidan ko'ra ancha past saviyadagi birinchiliklarda ko'rinish berayotgani ko'ngilni xira qiladi. Ularni faqat bir narsa sharqqa jalb qilmoqda: moliya.

SHundaylar borki, o'zining superklublar darajasidan quyilayotganini, biroq, futboldan ketish uchun navqironlik qilishini biladi. Evropa o'rtamiyona jamoalarining kamtarona takliflariga ham, «Pul topib, aql topmagan» sharq klublarining qop-qop pullariga ham parvo qilmay okeanorti tomon ravona bo'lishadi. Nisbatan oson MLS chempionatida o'z foliyatlarining intihosini o'tkazishadi. Oxirgi yillarda Stiven Jerrard, Andrea Pirlo, Frenk Lempard, Kaka va David Vilya kabi afsonalar MLSdan nafaqaga chiqib ketgani haqidagi malumotning o'ziyoq ushbu birinchilik haqidagi tasavvurlarni uyg'ota oladi.

Xo'sh, yurtimizda deyarli yoritilmaydigan MLSda bugun qaysi yulduzlar harakat qilmoqda? Bu savol hamma uchun qiziq. Transfer bozorida 200lik dovondan o'tilgan bir pallada MLSning faxriy yulduzlari qanchaga baholanmoqda? Hozir shu haqida so'z yuritamiz.

Bakari Sanya «Monreal»

«Arsenal» va «Manchester Siti» sharafini himoya qilgan Franciya terma jamoasining sobiq o'ng qanot himoyachisi «Monreal Impakt»da to'p tepmoqda. 36 yoshli futbolchining transfer narxi transfermarket.de saytida 500 ming evro deb ko'rsatilgan.

Tim Xovard «Kolorado Repids»

«Everton» klubi 2007 yilda Aleks Fergyuson jamoasidan amerikalik zaxira darvozabonini xarid qilgandi. Tim «Everton» darvozasini 10 mavsum davomida ishonchli tarzda himoya qildi va APLning eng barqaror golkiperlaridan biriga aylandi. Hozir 40 yoshli darvozabon Kolorado shtatining «Repids» jamoasi postini himoya qilmoqda. Uning transfer narxi 500 ming evro hisoblanadi.

Reto Cigler «Dallas»

«Tottenxem», «Yuventus», «Sampdoriya» singari klublar sharafini himoya qilib tanilgan shveycariyalik futbolchi bugun «Dallas»ning chap qanot himoyachisi hisoblanadi. 33 yoshli Retoning transfer bahosi 1 million evro.

Bastian SHvaynshtayger «CHikago Fayr»

1 avgustda 35 yoshni qarshilaydigan nemis futbolchisining transfer bahosi 2,25 million evro etib belgilangan.

Zlatan Ibragimovich «Los-Anjeles Gelaksi»

Zlatan 9 gol bilan chempionat to'purarlari ro'yxatida ikkinchi bo'lib turibdi. 38 yoshli «Gelaksi» hujumchisining taransfer qiymati 3,15 million evro.

Luish Nani «Orlando Siti»

Manchesterdan keyingi darbadarliklardan charchagan portugal «Orlando» libosini kiydi. Joriy mavsum 7 gol urishga ham muvaffaq bo'ldi. Uning transfer narxi 4,5 million evro qilib belgilangan.

Ueyn Runi «Di Si Yunayted»

33 yoshli Ueyn 15-turga kelib 7ta gol muallifiga aylandi. Uning transfer bahosi 7,2 million etib belgilangan. Runi MLSning eng qimmat futbolchilaridan biri hisoblanadi.

Faxriddin Ro'ziev tayyorladi