Mirjalol Qosimov: "Yana o'sha eski xatolar qimmatga tushdi"

Matbuot anjumanining ikkinchi qismida maydon egalari bosh murabbiyi Mirjalol Qosimov qatnashdi.

- O'yin haqida nima deya olaman. Yana o'sha eski xatolar qimmatga tushdi. "Al Jaish"ga qarshi o'yindagi bo'lgani kabi bitta futbolchi uch-to'rt nafar futbolchimizni aldab gol urdi. Ayrim futbolchilarimiz oddiy xatolarga yo'l qo'yishdi. Agar guruhdan chiqishni istasak bunday xatolar qilish kerak emas. Maydonga tushgandan so'ng bor kuchi bilan harakat qilish kerak, bugungidek emas, - deydi Qosimov.

- OCHLda faqat kuchli klublar o'ynashadi, bunday saviyada bunday xatolarga yo'l qo'yib bo'lmaydi. Yana bir narsani unutmaylik, bizda mavsum endi boshlanmoqda. Eronda esa ikkinchi davra ketmoqda. Hali hech narsa boy berilmadi. Keyingi o'yin biz uchun oxirgi imkoniyat bo'ladi.

- Hozir futbol bitta joyda turmayapti. Yugurmagan futbolchi pul topa olmaydi. Oldin "yotib" ham futbol o'ynay olish mumkin edi. Hozir unday emas. Bugun zaxiradan tushganlar o'yinni kuchaytira olishmadi.
 
- Pardaevda ham, SHodievda ham imkoniyatlar bo'ldi. Ammo to'p bilan muomalada xatolar bo'ldi. Bahodir raqib jarima maydoni ichida yaxshi o'ynaydi. Ammo bugun kuchli raqibga qarshi o'yinda tan olish kerak o'yini chiqmadi. Maydonga tushgach barcha o'z hissasini qo'shish kerak. SHu bois ham jamoaviy o'yin deyiladi.

- G'alaba qozona olmadik, bundan xursand emasman. G'olib bo'lganimizda imkoniyatimiz oshib ketardi. Bugun uch ochko uchun tushgandik. So'nggi daqiqalarda urgan golimiz bizga umid qoldirmoqda. Lekin durangdan qoniqmadim.