Mirzakamol Kamolov: “Andijon”ning fanatlari etakchi ekanligini barcha futbolchi biladi”

Futbolchi o'z navbatida ularga o'z fikrlarini bildirib o'tdi.

- Mirzakamol ilgari ham “Andijon”da o'ynagansiz. Oxirgi yillarda esa “Nasaf” va “Neftchi” singari klublarda to'p tepdingiz. Bu jamoalarni taqqoslaganda, qanday farqni ko'rasiz?
- Avvalambor assalomu alaykum. Ko'rsatuv ijodkorlari va muxlislarini yangi kirib kelayotgan futbol mavsumi va qolaversa Navro'z bayrami bilan tabriklayman. Savolingizga keladigan bo'lsak, men faqat bu borada bir narsani aytishim mumkin. Yani andijonlik fanatlarni yurtimizda etakchi ekanligini bemalol takidlay olaman. Menimcha bu fikrimga boshqa futbolchilar ham qo'shiladi.

- Bu yil yana “Andijon”ga qaytdingiz. Aslida Toshkentliksiz. Aytingchi boshqa viloyat jamoalarida faoliyat yuritishingiz shaxsiy hayotda qiyinchiliklarni keltirib chiqarmaydimi?
- O'sha paytda huquqiy jihatdan “Paxtakor” futbol klubiga tegishli bo'lganman. O'zingizga yaxshi malum bu klubda raqobat kuchli bo'lib kelgan. Asosiy tarkibda o'ynashim qiyin bo'lgach rahbariyat meni “Andijon”ga ijaraga bergandi. Tan olaman, bu erda o'ynab futbolchi sifatida yanada shakllandim. Ozmi-ko'pmi muxlislar mehrini qozondim. Ashaddiy ishqibozlarning qo'llab-quvvatlashi ham bizga ko'shimcha kuch bag'ishlaydi. Futbolchining hayoti shunaqa. Bugun Toshkentda bo'lsa, ertaga boshqa viloyat jamoasida. Hamma sportchi ham o'zini qoniqtirgan joyda faoliyat yuritishni istaydi. Bu yil “Andijon”ga bosh murabbiy ishonch bildirib meni ham taklif etdi. Endi siz muxlislarni va klub ishonchini oqlash uchun bor kuchimni berib o'ynayman.

- Ilgari “Andijon”da ijara asosida o'ynaganingizda “Paxtakor”ga qarshi bahslarni o'tkazib yuborardingiz. SHanba kuni 1-turda “sherlar”ga qarshi bo'lajak uchrashuvda sizni maydonda ko'rishimiz mumkinmi?
- Ha, to'g'ri aytdingiz. Haqiqatdan ham o'sha mavsumlarda o'zaro kelishuvga asosan “Paxtakor” bilan o'yinlarda maydonga tushmagandim. Lekin men hozir to'laqonli “Andijon” azosiman. Jamoa bilan esa yaqinda bir yillik shartnoma tuzdim. SHuning uchun raqibimiz “Paxtakor”mi, “Bunyodkor”mi yoki “Nasaf” bo'ladimi, bemalol o'ynayman olaman.

Islombek RUSTAMBEKOV yozib oldi.