Mirkomil Lokaev: Metallurgga urgan golim faoliyatimdagi eng muhimi

O'yindan keyin futbolchining fikrlari bilan qiziqdik.

- “Nasaf” bilan dastlabki o'yindagi durang va “Surxon” bilan safardagi alamli mag'lubiyatdan keyin “Metallurg” bilan uchrashuvda muxlislarimizni g'alaba bilan quvontirish shart edi. Barchamiz o'yindan oldin buni juda yaxshi tushinib, murabbiylarimiz har tomonlama o'yinga tayyorlashgandi. Raqibimiz “Metallurg” jamoasi kuchli tarkibga ega hurmatga sazovor klub sanaladi. O'yin ikki jamoa uchun ham juda og'ir kechdi. Xudoga shukur, biz oxirigacha kurash olib bordik va g'alabani qo'lga kiritdik.

So'nggi daqiqada kiritgan golim “Dinamo”ga g'alaba keltirganidan juda ham xursandman. Men faqat o'yin yakunida emas, o'yin davomida ham himoyadan murabbiylarimiz ko'rsatmasi bilan hujumga qo'shilib turdim. Ochig'ini aytsam, gol urishimni sezgandek edim. O'sha vaziyatda bosh bilan gol urish qiyin bo'lsa-da, omad kulib boqdi. Bu faoliyatimdagi eng muhim gol bo'ldi.

CHindan ham, “Metallurg” darvozasiga kiritgan g'alaba golim faoliyatimdagi dastlabkisi bo'ldi. G'alabamiz butun jamoaning murabbiylar ko'rsatmasi bilan oxirigacha kurashgani va muxlislarning qo'llab-quvvatlashi evaziga bo'ldi. “Dinamo” bitta oilaga aylangan. Nasib qilsa, g'alabali yurishni davom ettirishga bor kuchimizni sarflaymiz” – deydi 24 yoshli “Dinamo” himoyachisi Mirkomil Lokaev.

Usmon Ibodov suhbatlashdi.