"Lokomotiv" - "Bunyodkor" uchrashuvi nazoratchisi chetlatildi, Kovalenko esa ogohlantirilgan

Bugun Kovalenkoga hech qanday chetlatish berilmaganligi va "Lokomotiv" - "Bunyodkor" uchrashuvi nazoratchisi G'ayrat Karimovni hakamga yuqori ball qo'yganligi uchun 4 ta o'yinga chetlatish olganligi haqida xabardor bo'ldik. Takidlash joizki, Karimov o'yinda Valentin Kovalenkoga 8.5 ball qo'ygan edi. Ish qayta ko'rib chiqilganidan keyin hakamning bali 6.5 ga tushirilgan. Bunga sabab, "Bunyodkor" futbolchisini ikkinchi bo'limda amalga oshirgan jarima zarbasidan keyin, to'p "Lokomotiv" himoyachisining qo'liga tekkanligidir. SHu vaziyat uchun hakam "Lokomotiv" darvozasi tomon penalti belgilashi lozim bo'lgan.

Ushbu vaziyatga oydinlik kiritish maqsadida, PFL hakamlar departamenti bo'lim boshlig'i Bobur Haydarovga murojaat qildik.

"Lokomotiv" saytidagi xabar xato. Bilmadim, kim bu xabarni saytga joylashtirdi ekan. Haqiqatdan ham, nazoratchiga 4 ta o'yinlik diskvalifikaciya tayinlandi. SHu bilan birga bosh hakam va nazoratchining o'yinga belgilangan pulidan 25 foiz miqdorda ushlab qolindi. Kovalenko esa jiddiy tarzda ogohlantirildi. Hozircha u keyingi tur o'yinlariga tayinlanmay turadi. Uning ishi qayta ko'rib chiqiladi", - deydi Bobur Haydarov "SA"ga bergan intervyusida.

P.S: PFL reglamentiga ko'ra, uchrashuv bosh hakami 1 200 000, nazoratchi esa 500 000 so'm pul oladi. Demak, Valentin Kovalenko 300 000, G'ayrat Karimov esa 125 000 so'm jarimaga tortilgan.

Eslatib o'tamiz, ayni paytda Valentin Kovalenko o'smirlar o'rtasidagi Osiyo chempionatida ishlayapti. Bugungacha u ikkita o'yinni boshqarishga muvaffaq bo'ldi.