Klublarimiz kimlarni transfer qilishi mumkin?

2-davraga tayyorlanayotgan jamoalar tarkibni imkon qadar kuchaytirish payiga tushgan. Ularning ishini osonlashtirish uchun turli sabablar bilan mavsumning dastlabki qismini o'tkazib yuborgan bazi mahalliy futbolchilar haqida malumot beramiz.

Vladimir Kozak

"Paxtakor" maktabi tarbiyalanuvchisi bu yilni "Turon"da boshlashi kutilgan edi. Biroq, tomonlar kelisha olishmadi. Keyinroq u "Qo'qon-1912" mashg'ulotlarida ko'rinish bersa ham, jamoada qolmadi. 

So'nggi malumotlarga ko'ra, Samvel Babayan sobiq shogirdini Namanganda ko'rishni istayapti. Kozak "Navbahor"ning "Olimpik" bilan o'yinini stadionda kuzatdi.

Vitaliy Denisov

Maydonda har doim bor kuchini sarflashi tufayli muxlislarning yoqimtoyiga aylangan himoyachi ayni paytda erkin agent maqomida. Uning so'nggi jamoasi "Baltika" bo'lgandi. Qaysidir klub uni O'zbekistonga qaytarishni uddalasa, mahalliy muxlislarni ancha xursand qilar edi. 

Aytish kerakki, Vitaliy 35 yoshni qarshi oldi. U faoliyatini o'z Vatanida yakunlashga qarshi bo'lmasa kerak.

Sanjar Rashidov

O'tgan mavsumni SHuhrat Maqsudov boshchiligidagi "Bunyodkor"da o'tkazgan 28 yoshli yarim himoyachi bu yil hech qaysi klubda ko'rinish bergani yo'q. Rashidovlarning o'rtanchasi 2-davrada yana katta sahnaga qaytsa kerak. 

Javlon Ibrohimov

Iqtidorli yarim himoyachining oxirgi klubi "Navbahor" bo'lgan edi. Otasining vafoti tufayli bir muddat katta futboldan chetda qolgan Javlon shu kunlarda faoliyatini tiklash uchun mashg'ulotlarga zo'r beryapti. Ko'ramiz, Ibrohimovning navbatdagi jamoasi qaysi bo'lar ekan.

Akbar Ismatullaev

"Metallurg"ning so'nggi yillardagi sardori yilning dastlabki qismini uyda o'tkazdi. Bu jarohat bilan bog'liq. Yodingizda bo'lsa, 31 yoshli futbolchi o'tgan mavsumning 24-turi doirasidagi "Navbahor" bilan uchrashuvda safdan chiqqan edi.

Ismatullaevning saytimizga malum qilishicha, dastlabki 6 oyni tuzalish va sport formasini tiklash uchun sarflagan futbolchi tez orada yashil maydonga qaytadi.

Ivan Nagaev allaqachon "Lokomotiv" mashg'ulotlariga qo'shilgan. SHuningdek, bir necha kun oldin "Yangier"ni tark etgan Abduqahhor Hojiakbarov, Qahramon Bahodirov, "Legiya" bilan shartnomasini bekor qilgan Jasurbek Yaxshiboev ham erkin agentga aylandi.

obuna bo'ling → "Futbol ANALIZI"