Karantinga yordam. "Lokomotiv" PFK xayrli ishga qo'l urdi

Yurtimizda 16 martdan karantin elon qilingani hamda barcha sport tadbirlari to'xtatilganidan xabaringiz bor. Bularning barchasi dunyo jamoatchiligi diqqat-markazida bo'lib turgan koronavirusga qarshi samarali kurashish yo'lida qilinmoqda. 

O'zbekistonning ketma-ket uch karra chempioni "Lokomotiv" futbolchilari va murabbiylar shtabi shunday sinovli kunlarda xalqimiz dardiga malham bo'lish maqsadida xayrli ishga qo'l o'rishdi va o'z maoshlarining malum qismini karantinda qolayotgan aholi sog'lig'i uchun ajratishga qaror qilishdi. 

Jamoamiz azolaridan yig'ilgan pullarga qo'shimcha tibbiy niqoblar, tibbiy qo'lqoplar va boshqa kerakli narsalar xarid qilinadi. "Lokomotiv" PFK O'zbekiston aholisini shu kunlarda qiynayotgan global muammoga befarq qarab turmaydi va yurtimizdan koronavirus tezroq daf bo'lishi uchun qo'ldan kelgancha o'z hissasini qo'shadi. 

SHu o'rinda Superliganing boshqa klublarini ham #karantingayordam xeshtegi orqali o'ziga xos akciyaga chorlab qolamiz. Zero bu kasallik faqat koronavirusga chalinganlar muammosi emas, balki hammamiz uchun dolzarb masaladir. 

Umid qilamizki, hali quvonchli kunlar oldinda. Koronavirusni yo'qotish faqat Davlat zimmasidagi ish bo'lib qolmasdan bunga qarshi har bir fuqaro kurash olib borishi lozim. Buning uchun sizdan talab qilinadigani uyda qolish va salomatlik gigienasiga amal qilishdir. 

Ko'chaga chiqmang, uyda qoling va shu orqali koronavirus barham topishida o'z hissangizni qo'shing. 

"Lokomotiv" PFK matbuot xizmati.