Jasurbek Ermamatov: “Istiqlol"ning maqsadi - Superliga"

Bugun kuchli raqibga qarshi maydonga tushdik. “SHo'rtan” kuchli jamoa, 5 ta turdan beri yutqazmay kelayotgan edi. SHundan kelib chiqib, uchrashuvga jiddiy hozirlik ko'rdik va g'alaba qozondik.

Keyingi turda aynan “SHo'rtan” maydoniga safar uyushtiramiz. Bu uchrashuvdan ko'ra ham bizga raqib maydonida qiyin bo'lishi turgan gap. Bugun ular yutqazdi, endi biz bilan bo'ladigan uchrashuvga jiddiy hozirlik ko'rishadi. Biz ham yanada jiddiyroq mashg'ulotlar olib boramiz va nasib etsa safarda g'alaba qozonamiz degan umiddaman.

Jamoamizning maqsadi - Superligaga chiqish, buni jamoamizning har bir futbolchisi his qilayapti, shundan kelib chiqib maydonda borimizni berib harakat qilayapmiz. 

Davralar oralig'ida tarkibimizga yangi futbolchilar kelib qo'shilishdi, aytish mumkinki, ular jamoamizni kuchaytirishdi.

Har bir jamoa uchun muxlislarning daldasi juda muhim. Bugungi uchrashuvga vaqt ajratib kelib, jamoamizni qo'llab-quvvatlab turgan muxlislarga minnatdorchilik bildiraman.    
Bekzod Tolibov yozib oldi.

“Istiqlol” matubot xizmati bilan xamkorlikda tayyorlandi