Jasur Hamroev: Bu yil chiqmasak, keyingi yil Superligaga chiqish uchun kurashamiz

- Uchrashuv haqidagi fikrlaringiz?
- Bu o'yin raqibimiz uchun ham, biz uchun ham pley-offga yo'llanma beradigan Pro-ligadagi 2-o'rin uchun kurash edi. O'yinni yomon boshlamadik, ikki tomon ham tengkurash ko'rsatayotgan edi. Ammo bo'lim oxirida himoyadagi xatomiz tufayli gol o'tkazib yubordik. Natijada raqib ustunlikni o'z qo'liga oldi.

Ikkinchi bo'limda vaziyatlar yaratgan bo'lsak-da, gol kiritish uchun yigitlarimizda mahorat etishmadi. Vaziyatdan foydalanilganda ehtimol o'yin boshqacha kechardi.

- «Dinamo» avvalgi ikki turda peshqadam «Neftchi»ni mag'lub etdi, «SHo'rtan» bilan yaxshi o'ynab durang qayd etdi. Bugungi o'yin va natija esa avvalgi ikki bahsdan katta farq qilgani sababi nimada?
- Mavsum yakunida jamoada charchoq va jarohatlar o'z tasirini o'tkazdi. SHu bois o'yinimizda pasayish kuzatilgan bo'lishi mumkin. CHunki har 3-4 kunda o'ynayapmiz, qolaversa mavsum yakuni sababli aksariyat futbolchilar bardosh bera olishmaydi.

- «Dinamo» amalda Superligaga chiqish imkoniyatini yo'qotdi. Keyingi ikki o'yinda jamoani qanday ruhlantirmoqchisiz?
- Mavsum boshidan oxirigacha maqsadimiz Superligaga chiqish edi. Ammo jarohatlar pand berdi, deb o'ylayman. Nima ham derdim, bu – futbol. Keyingi ikki o'yinda ham maydonga tushib kurashamiz. Bu yil chiqmasak, keyingi yil Superligaga chiqish uchun kurashamiz.