Intervyu. G'olib G'aybullaev: "Jamoada qolishim aniq. Jiddiy vazifalarga esa tayyormiz"

Sir emaski, Qarshining "Nasaf" jamoasi joriy mavsumni ko'tarinki ruhda yakunladi. Finalda "Paxtakor"dan ustun kelgan  "ajdarlar" bosh sovringa ega chiqdi. Mazkur uchrashuvda g'alabaga goliga markaziy himoyachi G'olib G'aybullaev mualliflik qildi. Mazkur uchrashuv qaxramoni saytimiz muxbiriga bergan intervyusida kubok o'yini va keyingi rejalari haqida aytib o'tdi. 

- "Nasaf" uchun finalda O'zbekiston kubogi g'olibligini olib bergan muhim golni urdingiz. O'sha onlarda ichingizdan qanday hissiyotlar o'tdi? 

- Har qanday uchrashuvda raqib darvozasini ishg'ol qilish yoqimli hislarni taqdim qiladi. Ayniqsa finalda, masuliyatli o'yinda to'p kiritish ikki karra zavq beradi. O'sha onlarda xursandchiligimning cheki yo'q edi. 

- Mamlakat kubogi bahslarida ketma-ket ikki o'yinda bir kishi kam bo'la turib yakunda g'alaba qozonib ketilishi barchani o'ylantirib qo'ydi. Buning qandaydir jumboqli tomoni yoki siri bormi? Odatda chetlatishdan so'ng ustunlik raqib tomoniga o'tadi. "Nasaf"da esa buning aksini ko'rdik...

- Yarim final va final uchrashuvlarida haqiqiy iroda ko'rsata oldik, deb o'ylayman. Menimcha bunday hech kim bunday reja bilan tushmaydi. CHunki qizil kartochka olish yoki olmaslikni oldindan bilish qiyin. O'yindagi jarayondan kelib chiqib taktika o'zgartiriladi. Murabbiyimiz bunday pallada extiyotkor bo'lib o'ynashimizni takidladilar. 

- Jamoada mavsum so'nggiga kelib markaziy himoyada muammolar paydo bo'la boshladi. Husniddin Aliqulov safdan chiqdi. Mana shunday qiyin vaziyatda mudofaa chizig'idagi masuliyat siz va Umarbek Eshmurodovning bo'yniga tushdi. Aliqulovning o'rnini bilintirmaslik qiyin kechmadimi?

- Nafaqat himoyadagi balki mavsum davomidagi har bir yo'qotish qimmatga tushdi. Bilasiz zaxiramiz boshqa jamoalar singari keng emas. Lekin uddasidan chiqa oldik, deya olaman. 

- O'zbekiston kubogi "Nasaf"ning mavsum davomida qilgan harakatlariga yarasha berilgan bahomi? Yoki bu sovrin joriy yil uchun kam, deb hisoblaysizmi? CHunki Superkubok, OFK kubogi va chempionatda sovrindorlar qatoriga kirishga yaqin edinglar...

- Yo'q, deyagan bo'lardim. Superligani yaxshi o'rinlarda yakunlashimiz mumkin edi. OFK kubogi esa biz uchun haqiqiy tajriba maktabi vazifasini o'tab berdi. 

- Ayni paytda jamoada kayfiyat qanday? Finaldagi g'alaba uchun mukofot pullari berildimi, bu narsa kayfiyatga tasir qilmayaptimi?

- Jamoada kayfiyat har doim yaxshi bo'lgan. Qarzdorliklar esa bartaraf etilmoqda. 

- Har doim mavsum so'ngida jamoa futbolchilariga turli chorlovlar kelib tushadi. SHunday ekan  G'olib G'aybullaevni yangi mavsumda ham "Nasaf"da ko'ramizmi?

- Ha, "Nasaf"da qolishim aniq. Hozircha boshqa variantlarni o'ylamayapman. 

- Keyingi mavsumda jamoa oldiga anik maqsad qo'yilishi mumkin. "Nasaf" futbolchilari har yili bosimsiz, erkin o'ynashadi.  Natija esa oxirida bilinadi. Mavsum boshidan jiddiy vazifalar qo'yilishiga qanday qaraysiz?

- Menimcha o'tgan vaqt mobaynida jamoa sifatida ancha o'sishga erishdik. Xalqaro maydonda tajriba to'pladik. O'ylaymanki, jiddiy vazifalarga tayyormiz. 

Abdulaziz Iskandarov suhbatlashdi