Ilhom Mo'minjonov: “O'zgarishlar o'z samarasini berdi”

Ilhom Mo'minjonov (“Navbahor” bosh murabbiyi): - Avvalo, jamoamiz muxlislarini qiyin g'alaba bilan tabriklayman. SHogirdlarim ko'rsatmalarimni to'liq ravishda bajarishdi. Tarkibimizdagi asosiy 3 nafar futbolchimizning yo'qligini bildirishmadi va o'z irodalarini namoyish etib, g'alaba qozonishga muvaffaq bo'lishdi.

O'rinbosarlar tarkibidan mahalliy futbolchilarni asosiy tarkibga jalb etish borasida to'xtaladigan bo'lsam, yoshlar jamoamizning o'z murabbiyi bor – SHuhrat aka Qoraboev. Biz bu mutaxassisga to'liq ishonamiz. SHuhrat aka yosh futbolchilarni tarbiyalab, asosiy tarkibga etkazib bermoqda va yoshlar tarkibidan yangi o'yinchilar 2-davrada va kelasi yili sekin-asta asosiy tarkibdan joy olishadi, degan umiddaman.

Biz har bir uchrashuvda raqibga va o'yinning qanday kechishiga qarab, tarkibda o'zgarishlarni amalga oshiramiz. Jizzaxdagi o'yinda o'zgarishlar o'z samarasini bermagan, aksincha, 14 daqiqa ichida o'z darvozamizdan 3ta to'p olib chiqqandik. Bugungi bahsda esa o'zgarishlar o'z samarasini berdi.

Hozircha shu tarkib bilan transfer oynasi ochilguncha o'ynab turamiz va u yog'ini vaqt ko'rsatadi. Albatta, izlanishda va ishlashda davom etamiz va safardagi kuchli raqiblarga qarshi kechadigan bahslarda ham zafar quchib, muxlislarni xursand etishga intilamiz. Oston O'runov 17 yoshda va uning yorqin o'yinlari  hali oldinda, Xudo xohlasa!

Oston O'runov (“Navbahor” yarim himoyachisi): - Bugungi o'yinda murabbiylarimizning ko'rsatmalariga to'liq amal qilgan holda, zafar quchib, muxlislarimizni xursand etdik.