"Hokim kubogi-2022". Yarim finalda 8 ta to'p o'tkazib yuborgan "Denov" vakillari qanday fikrda?

Bekzod Azimov, "Denov" klubi rahbari:

- Biz "Hokim kubogi" musobaqasiga tajriba to'plash va tarkibni kuchaytirish uchun selekciya ishlarini amalga oshirish maqsadida kelganmiz. Albatta, bir qator kuchli jamoalar bilan o'yin o'tkazdik va yarim final bosqichiga qadar etib keldik. SHuncha jamoa ichida kuchli to'rtlikka kirish bu katta natija deb hisoblayman. Yigitlarga bugungi o'yindan keyin rahmat aytdim, ularni tushkunlikka tushmaslikka chorladim. "Qo'qon-1912" Superligada o'ynaydigan kuchli jamoa. Bu o'yin bizga katta tajriba maktabi bo'ldi deb o'ylayman.

Sanjar Ahmedov, jamoa sardori:

- Jamoamiz o'tgan mavsum yakunida Birinchi liga yo'llanmasini qo'lga kiritdi. "Hokim kubogi" musobaqasiga tarkibga yangi jalb etilgan futbolchilarni sinovdan o'tkazish va tajriba to'plash maqsadida kelganmiz. Mazkur musobaqada kuchli jamoalarga qarshi o'yin o'tkazdik, taasurotlarimiz yomon emas. 

Bugungi o'yinda bizda charchoq alomatlari sezilib qoldi. "Qo'qon-1912" Superliga jamoasi, tarkibida kuchli futbolchilari bor. Tezkor gol va darvozamiz tomon belgilangan 4 ta penaltilar hisobning shunday yirik ko'rinishga kelib qolishiga sabab bo'ldi deb o'ylayman. G'alaba bilan "Qo'qon-1912" jamoasini tabriklayman, kelgusida omad va zafarlar yor bo'lsin.

SHuningdek, klubimiz rahbari Bekzod Azimovga jamoadoshlarim nomidan minnatdorchilik bildirgan bo'lardim. U kishi safar harajatlarini o'zlari qoplagan xolda bizni "Hokim kubogi" musobaqasiga olib keldilar. 

Tumanimiz hokimligi qo'llab-quvvatlashi ostida yangi mavsumda Birinchi ligada munosib ishtirok etib, Pro-ligaga chiqishni maqsad qilganmiz. Denovda futbolsevar muxlislar juda ko'p, biz ularga katta futbol atmosferasini taqdim etmoqchimiz. Hozirda jamoamizda Jalil Kimsanov, Akmal Abdurahmonov, Sarvar Xolmatov, Robbim Hasanov, Eldor Boymatov, Dilshod Baratov kabi tajribali futbolchilar bor.

Ertaga musobaqaning 3-o'rini uchun "Do'stlik" jamoasiga qarshi maydonga chiqamiz. Bu jamoa bizga "eski tanish" hisoblanadi. Sababi ularga pulka o'yinlarida mag'lub bo'lgandik. Guruh bosqichida "Do'stlik"ni mag'lub etdik, xuddi shu tarzda ertaga ham g'alaba qozonib 3-o'rin sohibi bo'lmoqchimiz.

Bekzod Tolibov yozib oldi