"Hamyurtlar Kubogi - 2017". Finalchilar aniq!

Bugun naqd 54(!)ta jamoa qatnashgan xotira turnirida ishtirokchilar soni nafaqat musobaqa tarixida, balki yurtimizda o'tkaziladigan bolalar turnirlari orasida ham rekord darajaga chiqqan "Hamyurtlar Kubogi" yarim final o'yinlari o'tkazildi.

Yarim final uchrashuvlari oldidan hal qiluvchi o'yinlarga etib kelgan to'rt jamoa rasmiylari ishtirokida qura tashlash marosimi bo'lib o'tdi. Yangiyo'l futbolga ixtisoslashgan maktab internatining maydonida bo'lib o'tgan yarim final bahslari anchagina qiziqarli kechdi, desak mubolag'a bo'lmaydi. Ayniqsa, Olmaliqning BO'SM va Qibrayning "Qibray-1" jamoalari o'rtasidagi uchrashuv tomoshabop o'tdi. Garchi bellashuvda qibraylik yosh futbolchilar g'alaba qozongan bo'lsada, o'yin davomida ustunlik olmaliqliklar tarafida bo'ldi. Ruslan Gamadeev shogirdlari har bir bo'limi 30 daqiqadan iborat bo'lgan bellashuvning katta qismida raqibidan ustunlik qilishdi. Darvozani ishg'ol qilish uchun etarlicha imkoniyatlarga ega bo'lishdi. Ammo omad kelmasa qiyin ekan. Aksincha, qibraylik bolalar deyarli har bir hujumdan unumli foydalanishdi va finalga yo'l olishdi.

Ikkinchi yarim final bahsida esa, Toshkent viloyati terma jamoasi Yangiyo'l futbolga ixtisoslashgan maktab internat tarbiyalanuvchilariga qarshi maydonga chiqishdi. Birinchi yarim final o'yinidan farqli ravishda bu safar maydonda ustunlik qilgan jamoa g'alaba qozondi. Amalda mezbon hisoblangan yangiyo'llik bolalar viloyat termasiga nisbatan mazmunli o'yin namoyish qildi va yakunda 2:0 hisobida g'alaba qozondi.

Ertaga musobaqaning final va uchinchi o'rin uchun uchrashuvlari o'tkaziladi. Aytish kerak, musobaqaning yopilish marosimida bir qator rasmiylar ishtirok etishi ko'zda tutilgan. Qolaversa, marhum "paxtakorchilar" - Mixail An, Vladimir Fyodorov, Olim Ashirovning xotirasi uchun o'tkazilayotgan mazkur musobaqaning yopilish marosimiga Janubiy Koreya respublikasining mamlakatimizdagi elchixonasining rasmiy vakili ham qatnashishini bildirgan.

"HAMYURTLAR KUBOGI - 2017"

Yarim finallar    

BO'SM (Olmaliq) - "QIBRAY-1" (Qibray) - 1:3 (0:2)

Bosh hakam: Karamatullo Hasanov.

Qanot hakamlari: Ravshan Mavlonov, Tursunboy Jo'raboev.

Zaxiradagi hakam: Ahror Usmonov.

Nazoratchi: Ravshan Musulmonov.

Gollar: S.Xudoynazarov, 3 - 0:1. S.Xudoynazarov, 18 - 0:2. M.Sobirov, 45-penaltidan - 0:2. A.Salimov, 48 - 1:3.

YAFMI-2 (Yangiyo'l) - TOSHKENT vil.t.j. - 2:0 (2:0)

Bosh hakam: Ravshan Mavlonov.

Qanot hakamlari: Ahror Usmonov, Tursunboy Jo'raboev.

Zaxiradagi hakam: Karamatullo Hasanov.

Nazoratchi: Ravshan Musulmonov.

Gollar: SHokir SHarifjonov, 7 - 1:0. Diyorbek Mamadaliev, 20 - 2:0.