Farhod Tojiev: OCHLda "Lokomotiv"ga yordam bermoqchiman

"O'zimni ancha yaxshi his etyapman. Avvalo "Lokomotiv" rahbarlariga o'zimning katta minnatdorchiligimni bildirib o'tsam. Og'ir jarohat olishimga qaramay, menga jamoaning to'laqonli azosi sifatida qaradilar va maoshimni o'z vaqtida berib bordilar. Undan tashqari ikki marotaba Germaniyada bo'lib qaytdim. Barcha xarajatlarni klub o'z zimmasiga oldi. Bu esa menga qo'shimcha kuch bo'ldi va ular oldidagi vazifamni ado etish uchun tezroq sog'ayishga harakat qildim. 2 haftadan keyin yugurishni boshlayman. 20 dekabrdan keyin esa to'liq jamoa mashg'ulotlarida ishtirok etishim mumkin", - deydi Tojievlarning kenjasi.

- Sog'ayish jarayonida muammolar bo'lmadimi?
- Aslida 1 hafta avval qaytishim kerak edi. Lekin ha deganda ahvolim o'nglanavermagach, shifokorlar yana bir bor jiddiy ko'rikdan o'tkazdilar. Keyin o'zimni yaxshi his qila boshladim. Oyog'imdagi og'riq ham yo'qoldi. O'ylaymanki, yangi mavsumning ilk o'yinlarigacha tayyor bo'laman.

- OCHLda katta ehtimol bilan 1+2 yo'llanmasiga ega bo'lyapmiz...
- Yo'g'-e? Unda bizdan ikka karra yaxshi tayyorgarlik ko'rish talab qilinar ekan. Garchand "Lokomotiv" bilan shartnomam yakuniga etgan bo'lsa-da, bu jamoa rahbariyatining oldida yaxshi o'yinlarim bilan javob qaytarishim kerak. Ular og'ir damlarda meni tashlab qo'yishmadi. SHuning uchun boshqa jamoa haqida o'ylamasdan, "Lokomotiv"ni OCHL guruh o'yinlariga olib chiqish uchun mehnat qilaman.