Farhod Nishonov: "Superliga bo'lsin, Pro liga bo'lsin, hamma natija uchun o'ynayapti. Hech kim muxlislar uchun futbol o'ynagani yo'q"

- O'yin haqida 

- O'yin haqida gapiradigan bo'lsak, raqib yutish uchun hech narsa qilmadi. Biz o'zimizning xatolarimiz evaziga gollar o'tkazib yubordik. O'yinni nazorat qildik, vaziyatlar yaratdik, ammo ulardan foydalanishda sovuqqonlik etishmadi. Mashg'ulotlarda buni ustida ishlayapmiz. O'ylaymanki, bu holat o'yindan o'yinga yaxshilanib boradi va gollar urib, g'alaba qozonamiz.

- Jamoa tarkibida bir-ikki futbolchilar ko'rinish bermadi. Bunga sabab nima edi?

- Jamoa asosiy tarkibidan hech kimga joy kafolatlanmagan. Biz kelajakni o'ylagan holda ish tutamiz. Ayrimlar tartib-intizomga rioya qilmadi. Biz ularni intizomni to'g'rilash maqsadida qaydnomaga kiritmadik. U xoh jamoa etakchisi bo'lsin, xoh sardor bo'lsin, qonun hamma uchun bir xil. 

- Jamoa oldiga Kubokda qanday maqsadlar qo'yilgan?

- Har bir o'yinda g'alaba uchun harakat qilamiz. Superliga bo'lsin, Pro liga bo'lsin, hamma o'zi uchun, natija uchun o'ynayapti. Hech kim muxlislar uchun futbol o'ynagani yo'q. Bu juda yomon. Muxlis nima uchun o'yinlarni ko'rish uchun kelmayapti? Bo'sh tribunalarda futbol o'ynash futbolchilarga qiziq emas. Superliga va Pro liga bahslarini ko'ryapmiz, muxlislar yo'q. Bir nafar muxlisimiz bo'lsa, biz o'sha muxlis uchun chiroyli futbol ko'rsatishga harakat qilamiz. Natijaga chiroyli futbol orqali erishmoqchimiz. Tan olishimiz kerak, bu yo'qolib ketayotgan narsa. Muxlislar hozir futbolga emas, 10 karra ko'proq pul sarflab, toqqa borib dam olyapti. Biz muxlislar futbolga kelib rohat olishlarini xohlagan bo'lardik. Biz shu yo'ldamiz. Kubok o'yinlarida o'z futbolimizni namoyish qilamiz. Ishonamanki, O'zbekiston terma jamoasi va top-klublarda o'ynaydigan futbolchilarni etkazib beramiz.