ECHL. Tolibjon Qosimov: "Bugun "Real" va PSJ ustunlikka ega bo'ladi"

Saytimiz xodimi Tolibjon Qosimov "Real" - "Borussiya" va PSJ - "CHelsi" uchrashuvidan oldin o'z fikrlari bilan o'rtoqlashdi.

Tolibjon Qosimov:
"Real" - "Borussiya"
Bu jamoalarning chorak finalda o'zaro to'qnash kelishi malum bo'lgandayoq hammaning ko'z oldiga o'tgan mavsumdagi yarim final kelgandi. O'shanda madridliklar ustunroqdek tuyulgandi, ammo hammasi umuman boshqacha tus olgandi. Hozir ham "Qirollik klubi"ga favorit sifatida qaralmoqda, bunga asoslar etarli. Eng avvalo, o'tgan yili butun boshli "Real"ni bir o'zi tiz cho'ktirgan Robert Levandovski bugungi o'yinni o'tkazib yuboradi. Bundan tashqari, mehmonlar safida o'tgan yil "Real"ga qarshi o'ynaganlarning yarmidan ham ko'prog'i bugun o'ynamaydi.

"Real" bu mavsum ECHLdagi raqiblarini gollar shodasi bilan siylab kelmoqda. "Borussiya" esa avvalgi yildagi kabi kuchli ko'rinmayapti.

Bu uchrashuvga qadar mehmonlar tarkibida Marko Roys ajoyib formaga kirib olgan bo'lsa, mezbonlardan Ronaldu va Beyl istalgan himoya qo'rg'onini buzib o'ta oladigan darajada.

Bugungi uchrashuvda "Borussiya" tarkibidagi yo'qotishlarni va "Real"ning yaxshi formada ekanligini inobatga olib, mezbonlarni o'yinda ham, natijada ham ustunlik qilishadi deb ayta olamiz.

PSJ - "CHelsi"
Bu juftlikdagi baxs qolganlaridan qiziqarlilik bobida aslo qolishmaydi. "CHelsi"ning himoyasi eng kuchlilardan biri, yarim himoya ham istalgan raqibni cho'chita oladigan darajada kuchli. Hatto, murabbiy borasida ham Mourino Loran Blandan ancha tajribali va kuchli. Lekin, parijliklarda daxshatli qurol bor. Bu Ibragimovich-Kavani hujum tandemi. Bu ikki hujumchi istalgan qo'rg'onni yorib o'ta oladi. Zlatanning zargarona va jozibador zarbalariga mana man degan himoyachi va darvozabonlar ham to'sqinlik qila olishmaydi.

Londonliklar bugun himoyadan o'ynashga harakat qilishadi. Tezkor qarshi hujumlarda esa Azar va Oskar asosiy ishni bajarishadi. Parijliklar esa maydonning istalgan qismidan xavf solishlari mumkin. Moura, Matyuidi, Kabay kabi yarim himoyachilar butun maydon bo'ylab kombinaciyalar uyushtirishadi. Ularni yakunlashni esa yuqoridagi ikki tandem maromida bajaradi.

Bugungi o'yinda PSJ mezbon ekanligi va Ibragimovich o'zining eng yaxshi formasidaligini inobatga olib, parijliklarni kichik ustunlikka ega bo'lishlarini taxmin qilish mumkin. Londonliklar esa nimchorak finalda bo'lgani kabi barcha masalani o'z uylarida hal qilishga urinishadi.