Dilshod Jabborov: Abramov bilan tarkibdagi 70 foiz futbolchilar ilgari ham birga ishlagan

Dastlab jamoa sardori Dilshod Jabborovga murojaat qildik.

- Fuzaylovning o'rniga Abramovning tayinlandi. Bu sizningcha to'g'ri qarormi?
- Biz professionalmiz. SHu bois qaysi murabbiy bilan ishlasak ham o'z vazifamizga sidqidildan yondoshib, klubning o'z oldiga qo'ygan maqsadiga erishishi uchun bor kuchimizni sarflashimiz kerak bo'ladi. Rahbariyat bosh murabbiyni o'zgartirishga qaror qildi. Buni muhokama qilish bizning vakolatimizga kirmaydi.

- OCHL pley-off bahsidagi omadsiz o'yinning bosh aybdori sifatida ko'pchilik Fuzaylovni ko'rsatmoqda. Siz qanday fikrdasiz?
- Nazarimda bunga biz futbolchilar aybdormiz. CHunki murabbiyning bergan ko'rsatmalarini shu kuni to'liq bajara olmadik.

- Avvalgi murabbiyning ustun jihatlari nimada edi?
- Har bir murabbiy futbolda o'z falsafasiga ega bo'lganidek, Hakim Qayumovichning o'z qarashi bor edi. Umuman olganda bu mutahassis klubda yomon ishlamadi. Dastlabki yili 3-o'rinni egalladik. Keyin esa kumush medallariga ega chiqdik.

- U bilan xayrlashish qanday kechdi?
 - Murabbiy o'zi bilan ishlagan barchaga minnatdorchilik bildirgan xolda, omad tiladi va iliq tarzda xayrlashdik.

- Boshqaruv postiga Vadim Abramovning kelishini futbolchilar qanday qabul qildi?
- Juda yaxshi. Ayni paytdagi tarkibimizning 60-70 foizi ilgari Karlenovich bilan birga ishlagan. SHaxsan meni ham "Lokomotiv"ga Abramov taklif etgandi. Tajribali mutaxassis. Umid qilamanki bu murabbiy bilan ham ko'plab yutquvlarni qo'lga kiritamiz.

- Abramov bugun ilk mashg'ulotini o'tkazibdi. Birinchi kuni U sizlarga nimalar dedi?
- Ha, bugun yangi bosh murabbiy tanishtirildi va u bilan dastlabki mashg'ulotni o'tkazdik. Hozircha shu chempionatga puxta tayyorgarlik ko'rish aytildi. Endi yaqin kunlar ichida murabbiy futbolchilar bilan alohida gaplashsa kerak.

Islombek RUSTAMBEKOV suhbatlashdi.