Davronbek Karimov: Futbolga bo'lgan qiziqish “Norin”ni qayta tiklashga turtki berdi”

“Norin-teks” ig-egiruv korxonasi rahbari futbolning chinakam ishqibozi bo'lgani uchun ham tumanga katta futbol qaytishida amaliy yordam berib kelmoqda. Farg'onada o'tgan pulka bahslarini qoldirmasdan kuzatib borgan Davronbek Karimov jamoasi birinchi ligaga yo'llanmani qo'lga kiritgach, saytimizga dastlabki intervyusini berdi.

- “Norin” jamoamiz birinchi ligaga yo'llanmani qo'lga kiritganidan hozir juda mamnunman. Xursandchiligim cheksiz. Nihoyat maqsadimizga erishdik – deya gap boshladi Davronbek Karimov.  

- Millionlar o'yiniga bo'lgan qiziqish tufayli “Norin”ni qayta tiklashni maqsad qilgandik. O'z vaqtida Haqqulobodda katta futbol bo'lgan. Ammo so'nggi 18 yildan buyon jamoa yo'q edi. Tumanimiz hokimi rahnamoligida bu yil jamoa tuzishga erishdik. “Norin-teks” korxonasining homiyligida “Norin” kelasi yil o'zini har jihatdan ko'rsatadi degan umiddaman.

- Haqqulobodlik bo'lgan futbol kishilari – Rustam aka Hamidovni jamoa boshlig'i sifatida tayinlaganmiz. Bosh murabbiylikka esa sobiq futbolchi Fayzullo Ahmedovni olib kelganmiz. Bular o'z vaqtida “Norin”da o'ynashganini muxlislar yaxshi bilsa kerak. Qisqa fursat ichida kurashchan jamoa tuzilishida ularning ham hissasi katta bo'ldi.  

- “Norin” bu yil Namangan viloyati chempionatida munosib ishtirok etib, birorta ham mag'lubiyatga uchramadi. Ko'nglimiz to'ldi. Pulkada ham yigitlar ishonchni oqladi.

- Ayni paytga kelib jamoadagi sharoitlar yaxshi tomonga o'zgartirib borilmoqda. Stadonimiz yaqinda tamirdan chiqarildi. Futbolchilar uchun baza muammo emas. Ularga “Norin-teks” korxonasidan maxsus joy ajratilgan. Bosqichma-bosqich PFL talablari bajariladi va professionallik sari xarakat qilamiz.

- Klubda moliyaviy sharoitlarni o'rtacha deyish mumkin. Kelasi yil ham chempionatda munosib ishtirok etish uchun bu borada muammo tug'dirmaslikka urinamiz. SHu kungacha yigitlarni xizmatlari uchun munosib taqdirlab keldik. Bundan keyin ham shunday bo'ladi. Tumanimiz hokimi Azamjon Sultonov ham bu borada bizni qo'llab-quvvatlab kelmoqda. Eng asosiysi tumanga katta futbolni qaytarish bilan birga sog'lom-turmush tarzini ham keng tadbiq etishni o'ylayapmiz.

Islombek Rustambekov.