“Bunyodkor”ning jarohat olgan o'yinchilari qachon safga qaytadi?

Bu o'yinda jarohat tufayli Sardor Rashidov, Karles Koto, Bobir Akbarov, Anvar G'ofurov singari futbolchilar maydonga tushishmadi.

To'g'ri, Anvar G'ofurov zaxiradagilar ro'yxatiga kiritildi, ammo unda ham jarohat bor bo'lib, futbolchi chigalyozdi mashqlarida o'zini ko'p urintirmadi. “Bunyodkor” futbol klubi shifokori Qahramon Nurmuhammedov bilan bog'lanib, jarohat olgan o'yinchilarning qachon safga qaytishi borasida so'raganimizda shunday javobni oldik.

“Karles Koto jarohatidan qutulib, alohida yugurishni boshladi. Lekin u hali umumiy guruhga qo'shilgani yo'q. Sardor Rashidov safarda “Dinamo” bilan kechgan o'yinda jarohat olgandi, shu bois uyda “Lokomotiv”ga qarshi bahsni o'tkazib yubordi. Unga uyiga borib dam olib kelishi uchun murabbiylar javob berishgandi, yarim himoyachi ertaga qaytib keladi. Keyin esa yugurishni boshlaydi. Anvar G'ofurov bilan Bobir Akbarovning jarohati esa u qadar jiddiy emas. Ular engil mashqlar orqali o'z formalarini tiklab olishyapti”  - deydi “Bunyodkor” shifokori.

Malumki, kelasi haftaning chorshanba kuni “Bunyodkor” safarda “Al Jaish”ga qarshi o'ta muhim bellashuvda maydonga tushadi. Bu o'yinda istalgan hisobdagi g'alaba toshkentliklarni OCHLning keyingi bosqichiga olib chiqadi. SHuni hisobga olib, “Bunyodkor” o'zining to'liq tarkibida Qatarga yo'l oladigan bo'lsa, ijobiy natijadan umid qilish mumkin.

Xayrulla Xoliqov.