“Bunyodkor” Turkiyada Jazoir chempioni bilan durang o'ynadi

Ayni paytda Turkiyaning Istanbul shahrida mavsumning ikkinchi qismiga tayyorgarlik ko'rayotgan Toshkentning “Bunyodkor” jamoasi 17 iyul kuni Jazoirning amaldagi chempioni – “USMA Jazoir” klubiga qarshi o'rtoqlik uchrashuvida maydonga tushdi.

Qiziqarli kechgan bahsda jamoalar 1:1 hisobidagi durangga rozi bo'lishdi. O'yinning sakkizinchi daqiqasida Sardor Rashidov o'zining individual mahoratini ishga solib, “qaldirg'ochlar”ni hisobda oldinga olib chiquvchi golga mualliflik qildi. Biroq birinchi bo'lim oxirlab borayotgan pallada jazoirliklar javob to'pini kiritishdi.

Umuman olganda, davralar oralig'ida Sergey Lushan asosiy tarkibga jalb etmoqchi bo'lgan yosh futbolchilarni ushbu bahs orqali sinovdan o'tkazib oldi. SHuningdek, jamoada ko'rikdan o'tayotgan futbolchilarni ham maydonga tushirib, ular haqidagi amaliy tasavvurlarga ega bo'ldi.

O'rtoqlik uchrashuvi
“Bunyodkor” – “USMA Jazoir” 1:1 (1:1)
Gollar: Sardor Rashidov 8 (1:0), Jalit 40 (1:1)
“Bunyodkor”: 45.Akbar To'raev, 15.Islom Inomov, 18.Ivan Miloshevich, 3.SHukurali Po'latov, 26.Javlon Mirabdullaev, 5.Dilshod Jo'raev, 27.Sardor Sobirxo'jaev, 28.Dostonbek Hamdamov, 14.Vohid SHodiev, 10.Anvar Berdiev, 21.Sardor Rashidov
Zaxiradan maydonga tushganlar: 8.Javlon Ibroximov, 54.Temur Ayupov, 11.Oleksandr Pishur, 9.Minori Sato, 19.Zabixillo O'rinboev, 48.Akramjon Komilov, 4.Xayrulla Karimov, 2.Akmal SHorahmedov
17 iyul, payshanba. Istanbul