Bugun futbol. "Neftchi" to'rtta o'yinlik g'alabasiz seriyaga barham bera oladimi?

Farg'onaliklar yangi bosh murabbiy Vadim Abramov boshchiligida bugun uchinchi o'yinni o'tkazishadi. Avvalgi ikki o'yinda "Neftchi" "Dinamo"ga imkoniyatni boy bergan bo'lsa, "Mashal" bilan durang qayd etdi. 

Umuman olganda, "Neftchi" oxirgi to'rt uchrashuvdan beri g'alaba qozona olmayapti: ikki durang, ikki mag'lubiyat. Jamoa bugun "Metallurg"ni qabul qiladi. Bekobodliklar oxirgi paytlarda chakki emas. Xususan jamoa ketma-ket uch uchrashuvda g'alaba qozondi. "Metallurg" "Nasaf", "Obod" va "Qizilqum" klublarini mag'lub etdi. 

Oliy liga turnir jadvalida 15-o'rinda borayotgan "Neftchi" hozircha o'z maydonida faqat bir marta g'alabaga erishgan. Farg'onaliklar "Obod"ni 1:0 hisobida mag'lub etishgan. Jamoa shuningdek, ikki bor durang o'ynab uchta o'yinda yutqazib qo'ygan. 

Bugun "Metallurg" safarda ettinchi bahsini o'tkazadi. Avvalgi o'yinlarda bu jamoa faqat bir marta g'alaba qozongan. "Metallurg" Toshkentda "Obod"ni mag'lub etgan. "Metallurg"ning oxirgi besh uchrashuvdan faqat bittasida yutqazib qo'yganini inobatga olsak, jamoa hozir ancha o'ziga kelib olgan va bugun Farg'onada mezbonlarga oson bo'lmasligi kutilyapti.