Bugun futbol. "Neftchi" - "Paxtakor"

Bugun Farg'onada turnir jadvalining oxirgi hamda birinchi o'rinlarida borayotgan jamoalar o'zaro bahs olib borishadi. "Paxtakor" 29 ochko bilan peshqadamlik qilayotgan bo'lsa, "Neftchi" atigi 5 ochko to'plagan holda oxirgi o'rinni egallab turibdi. Ochkolar orasidagi farq 24ta.

Bugungi o'yinda "Neftchi"ga faqat o'z maydonida o'ynashigina ustunlik berishi mumkin. O'yin tomonlama esa "Paxtakor" ancha kuchli. "Neftchi" har o'yinda o'zining dastlabki g'alabasini nishonlashga harakat qilmoqda, biroq o'tgan 13ta bellashuvdan beri bu amalga oshgani yo'q.

Umuman olganda, Superligada g'alaba qozonmagan faqat bir jamoa qolgan. Bu jamoa "Neftchi" ekanini muxlislar yaxshi biladi. Farg'onaliklar uyda o'tkazilgan uchrashuvlarning ikkitasida durang o'ynab, 5 marta imkoniyatni boy berishgan. To'plar nisbati 2-11.

Bilasizmi? "Neftchi" oxirgi ikkita o'yinni bir xil 0:2 hisobida boy berdi. Jamoa safarda "Nasaf"dan, keyin o'z maydonida "So'g'diyona"dan shu hisobda mag'lubiyatga uchradi.

Fakt: "Neftchi" oxirgi to'rtta uchrashuvning bittasida durang o'ynab, uch marta mag'lub bo'ldi.

"Paxtakor" haqida gapiradigan bo'lsak, bu jamoaning maqsadi chempionlik. "SHerlar" oliy maqsad sari turma-tur harakat qilishmoqda. Oxirgi uchta turni g'alaba bilan yakunlagan "Paxtakor" bugun ham Farg'onada uch ochko uchun o'ynaydi.

Bilasizmi? "Paxtakor" shu paytgacha safarda olti bor maydonga tushgan bo'lsa, shundan uchtasida g'alabaga erishgan. SHota Arveladze shogirdlari "Metallurg", "Nasaf" va "So'g'diyona"dan ustun kelishgan.

Fakt: "Paxtakor" "Nasaf" bilan birga Superliga jamoalari orasida safarda eng kam gol o'tkazgan jamoa bo'lib turibdi: faqat to'rtta gol.